wo KHamushi hai ki KHud se Dara hua hun main

vo ḳhāmushī hai ki ḳhud se Darā huā huuñ maiñ

pata nahīñ kise āvāz de rahā huuñ maiñ

kuchh aise Dhab se ghaTā hai ga.e dinoñ meñ chāñd

mire ye dhyān paḌā hai ki miT rahā huuñ maiñ

palaT rahūñgā abhī ghar bahut udaas na ho

pahāḌiyoñ se guzartī huī sadā huuñ maiñ

huī jo shaam to dil meñ udāsiyāñ utrīñ

charāġh jalne lage haiñ to bujh gayā huuñ maiñ

vahī shabāb vahī bekasī kabhī pahle

gumān hai ki isī raah se gayā huuñ maiñ

vo ek jism vahī kau.dtā lapaktā jism

ki jis ke rañg kī nisbat se jogiyā huuñ maiñ

kabhī kabhī mire sapnoñ ko chhīn letī hai

vo ik nigāh ki jis kā luTā huā huuñ maiñ

laboñ pe tark-e-ta.alluq kī baat aate hī

har ek zaḳhm pukārā abhī harā huuñ maiñ

kuchh aise Dhab se mujhe log 'ashk' kahte haiñ

ki apne naam se begāna ho chalā huuñ maiñ

wo KHamushi hai ki KHud se Dara hua hun main

pata nahin kise aawaz de raha hun main

kuchh aise Dhab se ghaTa hai gae dinon mein chand

mere ye dhyan paDa hai ki miT raha hun main

palaT rahunga abhi ghar bahut udas na ho

pahaDiyon se guzarti hui sada hun main

hui jo sham to dil mein udasiyan utrin

charagh jalne lage hain to bujh gaya hun main

wahi shabab wahi bekasi kabhi pahle

guman hai ki isi rah se gaya hun main

wo ek jism wahi kaudta lapakta jism

ki jis ke rang ki nisbat se jogiya hun main

kabhi kabhi mere sapnon ko chhin leti hai

wo ek nigah ki jis ka luTa hua hun main

labon pe tark-e-talluq ki baat aate hi

har ek zaKHm pukara abhi hara hun main

kuchh aise Dhab se mujhe log 'ashk' kahte hain

ki apne nam se begana ho chala hun main