wo KHush-KHiram ki burj-e-zawal mein na mila

vo ḳhush-ḳhirām ki burj-e-zavāl meñ na milā

mujhe sukūn sitāre kī chaal meñ na milā

majāl de ke mujhe ḳhāmushī vabāl huī

mirā javāb vidā-e-savāl meñ na milā

vo nā-shanās rahā fāḳhera libāsoñ meñ

agar milā to mohabbat kī shaal meñ na milā

nazar mile to use dekh be yaqīnī se

jise qayām shab-e-ehtimāl meñ na milā

vo be-hijāb mirī yaad se hijāb kare

ajiib kyā hai ki ab tak ḳhayāl meñ na milā

mirā mizāj kisī ke mizāj se na mile

mirā kamāl kisī ke kamāl meñ na milā

safar meñ rakh mujhe merī judā.iyoñ se parakh

firāq de abhī ḳhāk-e-visāl meñ na milā

wo KHush-KHiram ki burj-e-zawal mein na mila

mujhe sukun sitare ki chaal mein na mila

majal de ke mujhe KHamushi wabaal hui

mera jawab wida-e-sawal mein na mila

wo na-shanas raha faKHera libason mein

agar mila to mohabbat ki shaal mein na mila

nazar mile to use dekh be yaqini se

jise qayam shab-e-ehtimal mein na mila

wo be-hijab meri yaad se hijab kare

ajib kya hai ki ab tak KHayal mein na mila

mera mizaj kisi ke mizaj se na mile

mera kamal kisi ke kamal mein na mila

safar mein rakh mujhe meri judaiyon se parakh

firaq de abhi KHak-e-visal mein na mila