wo KHun baha ki shahr ka sadqa utar gaya

vo ḳhuuñ bahā ki shahr kā sadqa utar gayā

ab mutma.in haiñ log ki dariyā utar gayā

phir jama.a kar rahā huuñ par-e-kāh-e-sarguzisht

hairān huuñ ki zehn se kyā kyā utar gayā

aaseb rāste meñ shajar roz-o-shab ke the

jañgal ke paar maiñ tan-e-tanhā utar gayā

ġharqāb hauke sīkhī hai gauhar-shanāvarī

patthar na thā ki paanī meñ gahrā utar gayā

mujh ko to be-maza lagā paanī kā zā.iqa

vo kaun thā jo dasht meñ pyāsā utar gayā

haañ haar maan lī tirī yādoñ ke rū-ba-rū

is baar kufr-e-sañg meñ tesha utar gayā

le aa.iiñ kis farāz pe lafzoñ kī sīḌhiyāñ

kāġhaz pe hū-ba-hū vo sarāpā utar gayā

aahaT ilaaj hai dil-e-vahshat-pasand kā

rakhā namak zabāñ pe ki nashsha utar gayā

'shāhid' talāsh-e-rizq hai taa.ir kī justujū

paanī mujhe jahāñ nazar aayā utar gayā

wo KHun baha ki shahr ka sadqa utar gaya

ab mutmain hain log ki dariya utar gaya

phir jama kar raha hun par-e-kah-e-sarguzisht

hairan hun ki zehn se kya kya utar gaya

aaseb raste mein shajar roz-o-shab ke the

jangal ke par main tan-e-tanha utar gaya

gharqab hauke sikhi hai gauhar-shanawari

patthar na tha ki pani mein gahra utar gaya

mujh ko to be-maza laga pani ka zaiqa

wo kaun tha jo dasht mein pyasa utar gaya

han haar man li teri yaadon ke ru-ba-ru

is bar kufr-e-sang mein tesha utar gaya

le aain kis faraaz pe lafzon ki siDhiyan

kaghaz pe hu-ba-hu wo sarapa utar gaya

aahaT ilaj hai dil-e-wahshat-pasand ka

rakha namak zaban pe ki nashsha utar gaya

'shahid' talash-e-rizq hai tair ki justuju

pani mujhe jahan nazar aaya utar gaya