wo KHun-e-insan se hath jin ke sane hue hain

vo ḳhūn-e-insāñ se haath jin ke sane hue haiñ

payāmbar amn-o-āshatī ke bane hue haiñ

karūñgā tūfāñ ke baad un kī mizāj-pursī

ghamanD se chuur peḌ jitne tane hue haiñ

vo log ab chāñd ko basāne kī fikr meñ haiñ

jo is zamīñ ke amaañ ke dushman bane hue haiñ

the āsmāñ par tabāhiyoñ ke jo halke bādal

vo ahd-e-nau meñ na jaane kaise ghane hue haiñ

kisī bhī ik mas.ale kā hal aaj tak na niklā

jo zindagī ke the mas.ale sab bane hue haiñ

ḳhudā ne jannat kī saarī āsā.isheñ to dī thiiñ

ye saare dukh zindagī ke tere jane hue haiñ

unheñ manāne meñ vaqt zaa.e.a karo na 'sābir'

anā ke bande jo be-sabab hī tane hue haiñ

wo KHun-e-insan se hath jin ke sane hue hain

payambar amn-o-ashati ke bane hue hain

karunga tufan ke baad un ki mizaj-pursi

ghamanD se chur peD jitne tane hue hain

wo log ab chand ko basane ki fikr mein hain

jo is zamin ke aman ke dushman bane hue hain

the aasman par tabahiyon ke jo halke baadal

wo ahd-e-nau mein na jaane kaise ghane hue hain

kisi bhi ek masale ka hal aaj tak na nikla

jo zindagi ke the masale sab bane hue hain

KHuda ne jannat ki sari aasaishen to di thin

ye sare dukh zindagi ke tere jane hue hain

unhen manane mein waqt zaea karo na 'sabir'

ana ke bande jo be-sabab hi tane hue hain