wo KHwab ya KHayal hai main jaan lun to kuchh kahun

vo ḳhvāb yā ḳhayāl hai maiñ jaan luuñ to kuchh kahūñ

jo ranj-e-māh-o-sāl hai maiñ jaan luuñ to kuchh kahūñ

abhī mujhe ḳhabar nahīñ maiñ kis liye udaas huuñ

jo huzn hai malāl hai maiñ jaan luuñ to kuchh kahūñ

ġhubār-e-ārzū chhaTe to phir koī ḳhabar mile

ye hijr hai visāl hai maiñ jaan luuñ to kuchh kahūñ

faqīh-e-shahr ek jaam pī ke dekh luuñ zarā

harām yā halāl hai maiñ jaan luuñ to kuchh kahūñ

ka.ī dinoñ se ek sher bhī nahīñ kahā gayā

uruuj yā zavāl hai maiñ jaan luuñ to kuchh kahūñ

go zaḳhm sil ga.e magar kasak to aur baḌh ga.ī

ye kaisā indimāl hai maiñ jaan luuñ to kuchh kahūñ

kalī chaTakne dījiye abhī na mujh se pūchhiye

ye zard hai ki laal hai maiñ jaan luuñ to kuchh kahūñ

radīf aur qāfiye nibhā diye ga.e magar

ġhazal bhī lā-zavāl hai maiñ jaan luuñ to kuchh kahūñ

abhī to mere paas thā abhī ye dil kidhar gayā

ye zulf hai ki jaal hai maiñ jaan luuñ to kuchh kahūñ

hamāre saath yaar log phir se haath kar ga.e

yā ab ke terī chaal hai maiñ jaan luuñ to kuchh kahūñ

wo KHwab ya KHayal hai main jaan lun to kuchh kahun

jo ranj-e-mah-o-sal hai main jaan lun to kuchh kahun

abhi mujhe KHabar nahin main kis liye udas hun

jo huzn hai malal hai main jaan lun to kuchh kahun

ghubar-e-arzu chhaTe to phir koi KHabar mile

ye hijr hai visal hai main jaan lun to kuchh kahun

faqih-e-shahr ek jam pi ke dekh lun zara

haram ya halal hai main jaan lun to kuchh kahun

kai dinon se ek sher bhi nahin kaha gaya

uruj ya zawal hai main jaan lun to kuchh kahun

go zaKHm sil gae magar kasak to aur baDh gai

ye kaisa indimal hai main jaan lun to kuchh kahun

kali chaTakne dijiye abhi na mujh se puchhiye

ye zard hai ki lal hai main jaan lun to kuchh kahun

radif aur qafiye nibha diye gae magar

ghazal bhi la-zawal hai main jaan lun to kuchh kahun

abhi to mere pas tha abhi ye dil kidhar gaya

ye zulf hai ki jal hai main jaan lun to kuchh kahun

hamare sath yar log phir se hath kar gae

ya ab ke teri chaal hai main jaan lun to kuchh kahun