wo ku-e-yar ko jate hain be-niyaz nahin

vo kū-e-yār ko jaate haiñ be-niyāz nahīñ

haiñ sañg-e-dil hī vahāñ koī dil-navāz nahīñ

hai muḳhtasar sā hī qissa hayāt kā logo

kisī ke hisse kī to umr kuchh darāz nahīñ

dikhā.e raah magar kaisā āftāb hai vo

ho jis ko mashriq-o-maġhrib meñ imtiyāz nahīñ

burī nahīñ hai ḳhud-ārā.ī par ye Thiik nahīñ

ki samjho ḳhud sā jahāñ meñ hai sarfarāz nahīñ

ye ābshār se maġhmūm chashm se jo gire

kareñge kyā kaho patthar kā dil gudāz nahīñ

kareñge sajde jahāñ par dikhe tirā paikar

hai but-parastī ko darkār jā-namāz nahīñ

ġhurūb-o-sharq haiñ taqdīr-ḳhur magar mujh ko

nasheb hī nazar aatā hai ab farāz nahīñ

nikāl naqs magar itnā yaad rakh 'nāqid'

hai nukta-chīnī se mujh ko bhī ehtirāz nahīñ

wo ku-e-yar ko jate hain be-niyaz nahin

hain sang-e-dil hi wahan koi dil-nawaz nahin

hai muKHtasar sa hi qissa hayat ka logo

kisi ke hisse ki to umr kuchh daraaz nahin

dikhae rah magar kaisa aaftab hai wo

ho jis ko mashriq-o-maghrib mein imtiyaz nahin

buri nahin hai KHud-arai par ye Thik nahin

ki samjho KHud sa jahan mein hai sarfaraaz nahin

ye aabshaar se maghmum chashm se jo gire

karenge kya kaho patthar ka dil gudaz nahin

karenge sajde jahan par dikhe tera paikar

hai but-parasti ko darkar ja-namaz nahin

ghurub-o-sharq hain taqdir-KHur magar mujh ko

nasheb hi nazar aata hai ab faraaz nahin

nikal naqs magar itna yaad rakh 'naqid'

hai nukta-chini se mujh ko bhi ehtiraaz nahin