wo kuza-gar hai to phir chaak par chaDhae mujhe

vo kūza-gar hai to phir chaak par chaḌhā.e mujhe

dikhā.e apnā hunar mujh sā phir banā.e mujhe

hai 'ilm sab ko ki rakhnā hai hasratoñ pe lagām

hai karnā kaise magar koī to batā.e mujhe

vo jis meñ tum mujhe kahte ho aao baiTho paas

us ek ḳhvāb se kah do na roz aa.e mujhe

ḳhayāl bhī nahīñ lā saktī ḳhud-kushī kā maiñ

kisī bhī dar pe nahīñ jaanā bin bulā.e mujhe

qasam se phone mirā silent mode pe thā

na de bahāne vahī ab sune-sunā.e mujhe

lab us ke bārhā inkār kar rahe haiñ 'sifar'

nigāh us kī kahānī na.ī sunā.e mujhe

wo kuza-gar hai to phir chaak par chaDhae mujhe

dikhae apna hunar mujh sa phir banae mujhe

hai 'ilm sab ko ki rakhna hai hasraton pe lagam

hai karna kaise magar koi to batae mujhe

wo jis mein tum mujhe kahte ho aao baiTho pas

us ek KHwab se kah do na roz aae mujhe

KHayal bhi nahin la sakti KHud-kushi ka main

kisi bhi dar pe nahin jaana bin bulae mujhe

qasam se phone mera silent mode pe tha

na de bahane wahi ab sune-sunae mujhe

lab us ke barha inkar kar rahe hain 'sifar'

nigah us ki kahani nai sunae mujhe