wo lab hi kya hain ki jin par teri baaten nahin hotin

vo lab hī kyā haiñ ki jin par tirī bāteñ nahīñ hotīñ

vo dil hī kyā ki jis dil meñ tirī yādeñ nahīñ hotīñ

ye takrār-e-mohabbat bhī mohabbat hī ke baa.is hai

mohabbat darmiyāñ na ho to takrāreñ nahīñ hotīñ

tumhārī yaad aate hī mirī āñkheñ barastī haiñ

agar tum yaad na aao to barsāteñ nahīñ hotīñ

huī haiñ jab se raushan dil meñ tere pyaar kī sham.eñ

to mere dil kī duniyā meñ kabhī rāteñ nahīñ hotīñ

na ho dariyā meñ gar paanī use dariyā nahīñ kahte

na ho āñkhoñ meñ gar aañsū to vo āñkheñ nahīñ hotīñ

har ik lamha tirī yādeñ mirī sāñsoñ meñ rahtīñ haiñ

hoñ terī yaad se ġhāfil to vo sāñseñ nahīñ hotīñ

shab-e-furqat ġhazal likh kar sitāroñ ko sunātā huuñ

ki jab jab bhī tirī merī mulāqāteñ nahīñ hotīñ

wo lab hi kya hain ki jin par teri baaten nahin hotin

wo dil hi kya ki jis dil mein teri yaaden nahin hotin

ye takrar-e-mohabbat bhi mohabbat hi ke bais hai

mohabbat darmiyan na ho to takraren nahin hotin

tumhaari yaad aate hi meri aankhen barasti hain

agar tum yaad na aao to barsaten nahin hotin

hui hain jab se raushan dil mein tere pyar ki shamen

to mere dil ki duniya mein kabhi raaten nahin hotin

na ho dariya mein gar pani use dariya nahin kahte

na ho aankhon mein gar aansu to wo aankhen nahin hotin

har ek lamha teri yaaden meri sanson mein rahtin hain

hon teri yaad se ghafil to wo sansen nahin hotin

shab-e-furqat ghazal likh kar sitaron ko sunata hun

ki jab jab bhi teri meri mulaqaten nahin hotin