wo lab-kusha hon to goshe kai nikalte hain

vo lab-kushā hoñ to goshe ka.ī nikalte haiñ

isī charāġh se kitne charāġh jalte haiñ

maiñ jal rahā huuñ magar kaun is ko mānegā

mire vajūd se sho.ale kahāñ nikalte haiñ

kisī libās meñ ḳhud ko chhupā nahīñ paate

libās din meñ ka.ī baar jo badalte haiñ

ye ahl-e-ilm kā sheva kabhī rahā hī nahīñ

jo kuchh nahīñ haiñ vahī sar uThā ke chalte haiñ

ḳhatā muaaf hameñ aap hī se shikva hai

ki ham tabāh faqat aap hī ke chalte haiñ

bahut se log samajhte haiñ ḳhud-sarī is ko

ki ham hanūz isī shaan se nikalte haiñ

kabhī vo tiir nahīñ baiThte nishāne par

kashāñ kashāñ jo kamāñ se tirī nikalte haiñ

samajh ga.e the na pighle to TuuT jā.eñge

vagarna barf ke tuude kahīñ pighalte haiñ

qadam qadam pe vo phir Thokareñ nahīñ khāte

'shamīm' ek hī Thokar meñ jo sambhalte haiñ

wo lab-kusha hon to goshe kai nikalte hain

isi charagh se kitne charagh jalte hain

main jal raha hun magar kaun is ko manega

mere wajud se shoale kahan nikalte hain

kisi libas mein KHud ko chhupa nahin pate

libas din mein kai bar jo badalte hain

ye ahl-e-ilm ka shewa kabhi raha hi nahin

jo kuchh nahin hain wahi sar uTha ke chalte hain

KHata muaf hamein aap hi se shikwa hai

ki hum tabah faqat aap hi ke chalte hain

bahut se log samajhte hain KHud-sari is ko

ki hum hanuz isi shan se nikalte hain

kabhi wo tir nahin baiThte nishane par

kashan kashan jo kaman se teri nikalte hain

samajh gae the na pighle to TuT jaenge

wagarna barf ke tude kahin pighalte hain

qadam qadam pe wo phir Thokaren nahin khate

'shamim' ek hi Thokar mein jo sambhalte hain