wo lafz tir bana kar kaman bharta hai

vo lafz tiir banā kar kamān bhartā hai

jo kaan khīñchne vāloñ ke kaan bhartā hai

unhī kī aañkh meñ martā hai Duub kar dariyā

ki jin kī pyaas kā paanī jahān bhartā hai

maraz ilaaj se baḌhtā gayā to ham pe khulā

tabīb-e-ishq to apnī dukān bhartā hai

sitāre bante haiñ jab shaam toḌ de sūraj

yahīñ se jholī tirā āsmān bhartā hai

koī batā.e use haal taaki lauT aa.e

ki terā qarz tirā ḳhāndān bhartā hai

ḳhalā ugaltī hai sayyāre terī rāhoñ meñ

tū hausle se jo ḳhālī uḌaan bhartā hai

falak se kuchh bhī utartā nahīñ yūñhī 'shāhid'

zamīn-zād zamīñ kā lagān bhartā hai

wo lafz tir bana kar kaman bharta hai

jo kan khinchne walon ke kan bharta hai

unhi ki aankh mein marta hai Dub kar dariya

ki jin ki pyas ka pani jahan bharta hai

maraz ilaj se baDhta gaya to hum pe khula

tabib-e-ishq to apni dukan bharta hai

sitare bante hain jab sham toD de suraj

yahin se jholi tera aasman bharta hai

koi batae use haal taki lauT aae

ki tera qarz tera KHandan bharta hai

KHala ugalti hai sayyare teri rahon mein

tu hausle se jo KHali uDan bharta hai

falak se kuchh bhi utarta nahin yunhi 'shahid'

zamin-zad zamin ka lagan bharta hai