wo lamha ki KHamoshi-e-shab naghma-sara thi

vo lamha ki ḳhāmoshī-e-shab naġhma-sarā thī

kānoñ pe garāñ dil ke dhaḌakne kī sadā thī

jis moḌ pe chhoḌī hai sahāroñ kī tamannā

kahte haiñ baḌā qahr vahī laġhzish-e-pā thī

kyuuñ aaj dhuāñ ban ke ufuq-tā-ba-ufuq hai

is saañs meñ kaliyoñ ke chaTakne kī sadā thī

har lamha-e-betāb ne DhūñDī haiñ panāheñ

gūñjī thī ḳhamoshī tirī āvāz to kyā thī

har din ke sahīfe pe tirā naam likhā hai

har shab kī jabīñ terā nishān-e-kaf-e-pā thī

kyā kahte ki hoñToñ pe bas ik harf-e-vafā thā

kyā kījiye har saañs jo ta.azīr-e-vafā thī

uThte hue dekhā hai dhuāñ ātish-e-gul se

kyā nik.hat-e-barbād jale dil kī duā thī

kyā jāniye marnā bhī ravā hai ki nahīñ hai

takvīn ke lab par mire jiine kī duā thī

wo lamha ki KHamoshi-e-shab naghma-sara thi

kanon pe garan dil ke dhaDakne ki sada thi

jis moD pe chhoDi hai sahaaron ki tamanna

kahte hain baDa qahr wahi laghzish-e-pa thi

kyun aaj dhuan ban ke ufuq-ta-ba-ufuq hai

is sans mein kaliyon ke chaTakne ki sada thi

har lamha-e-betab ne DhunDi hain panahen

gunji thi KHamoshi teri aawaz to kya thi

har din ke sahife pe tera nam likha hai

har shab ki jabin tera nishan-e-kaf-e-pa thi

kya kahte ki honTon pe bas ek harf-e-wafa tha

kya kijiye har sans jo tazir-e-wafa thi

uThte hue dekha hai dhuan aatish-e-gul se

kya nikhat-e-barbaad jale dil ki dua thi

kya jaaniye marna bhi rawa hai ki nahin hai

takwin ke lab par mere jine ki dua thi