wo lamha mujhko shashdar kar gaya tha

vo lamha mujh ko shashdar kar gayā thā

mire andar bhī laavā bhar gayā thā

hai donoñ samt vīrānī kā aalam

isī raste se vo lashkar gayā thā

guzārī thī bhañvar meñ us ne lekin

vo māñjhī sāhiloñ se Dar gayā thā

qalandar mutma.in thā jhoñpaḌe meñ

abas us ke liye mahzar gayā thā

na jaane kaisī aahaT thī fazā meñ

vo din Dhalte hī apne ghar gayā thā

abhī tak bām-o-dar haiñ phuul jaise

mire ghar bhī vo ḳhush-manzar gayā thā

sitāre bā-adab Thahre hue the

ḳhalā meñ ek ḳhush-paikar gayā thā

idhar āñkhoñ meñ merī dhuul Thahrī

udhar shabnam se manzar bhar gayā thā

magar tishna-labī Thahrī muqaddar

nadī ke paas bhī 'amabar' gayā thā

wo lamha mujh ko shashdar kar gaya tha

mere andar bhi lawa bhar gaya tha

hai donon samt virani ka aalam

isi raste se wo lashkar gaya tha

guzari thi bhanwar mein us ne lekin

wo manjhi sahilon se Dar gaya tha

qalandar mutmain tha jhonpaDe mein

abas us ke liye mahzar gaya tha

na jaane kaisi aahaT thi faza mein

wo din Dhalte hi apne ghar gaya tha

abhi tak baam-o-dar hain phul jaise

mere ghar bhi wo KHush-manzar gaya tha

sitare ba-adab Thahre hue the

KHala mein ek KHush-paikar gaya tha

idhar aankhon mein meri dhul Thahri

udhar shabnam se manzar bhar gaya tha

magar tishna-labi Thahri muqaddar

nadi ke pas bhi 'amabar' gaya tha