wo mausam be-KHudi ke the jo mausam hum guzar aae

vo mausam be-ḳhudī ke the jo mausam ham guzār aa.e

ki jab chāhā tumhāre naam se ḳhud ko pukār aa.e

safar kī sab aziyyat muntazir āñkheñ agar le leñ

paroñ meñ tāqat-e-parvāz phir be-iḳhtiyār aa.e

maiñ tishna-lab zamīnoñ par kahāñ tak chashm-e-tar rakhtī

safar meñ zindagī ke har qadam par reg-zār aa.e

ġhamoñ ke dosh par jab qarya-e-jāñ kā safar Thahrā

charāġh ashkoñ ke rakhe ḳhvāb palkoñ se utaar aa.e

mire ḳhvāboñ ke saare rañg jis kī muTThiyoñ meñ haiñ

na jaane ab vo kyā chāhe yahāñ kyuuñ baar baar aa.e

badalte mausamoñ ko ḳhuuñ se rañgīñ pairahan de kar

chalo ham dast-e-qātil kā har ik ehsāñ utaar aa.e

vafā ke tishnagī ke aur kuchh ma.asūm va.adoñ ke

ye saare qarz dekho ham lab-e-dariyā utaar aa.e

wo mausam be-KHudi ke the jo mausam hum guzar aae

ki jab chaha tumhaare nam se KHud ko pukar aae

safar ki sab aziyyat muntazir aankhen agar le len

paron mein taqat-e-parwaz phir be-iKHtiyar aae

main tishna-lab zaminon par kahan tak chashm-e-tar rakhti

safar mein zindagi ke har qadam par reg-zar aae

ghamon ke dosh par jab qarya-e-jaan ka safar Thahra

charagh ashkon ke rakhe KHwab palkon se utar aae

mere KHwabon ke sare rang jis ki muTThiyon mein hain

na jaane ab wo kya chahe yahan kyun bar bar aae

badalte mausamon ko KHun se rangin pairahan de kar

chalo hum dast-e-qatil ka har ek ehsan utar aae

wafa ke tishnagi ke aur kuchh masum wadon ke

ye sare qarz dekho hum lab-e-dariya utar aae