wo mehr-e-zar-nigar hai ufuq ke par us taraf

vo mehr-e-zar-nigār hai ufuq ke paar us taraf

jo hai sitāra-vār hai ufuq ke paar us taraf

azal se likh rahā hai jo na.ī na.ī hikāyateñ

'ajab kahānī-kār hai ufuq ke paar us taraf

lahak rahī hai dekhiye shafaq-nazhād raushnī

qadīm murġh-zār hai ufuq ke paar us taraf

ye kis kī jeb se girīñ nujūm kī asharfiyāñ

koī to māl-dār hai ufuq ke paar us taraf

mujhe mirī sadāoñ kā javāb naqd kyā mile

jo hai to bas udhār hai ufuq ke paar us taraf

ufuq ke paar us taraf zarūr jā.uñgā kabhī

ki merā intizār hai ufuq ke paar us taraf

mujhe ridā-e-surḳh se yahī muġhālta huā

khaḌī koī kuñvār hai ufuq ke paar us taraf

vahīñ se buuñd buuñd kuchh ḳhayāl mujh tak aa ga.e

suḳhan kā ābshār hai ufuq ke paar us taraf

idhar udhar hī ghūmte rahoge ‘yāvar-e-‘azīm'

na aar hai na paar hai ufuq ke paar us taraf

wo mehr-e-zar-nigar hai ufuq ke par us taraf

jo hai sitara-war hai ufuq ke par us taraf

azal se likh raha hai jo nai nai hikayaten

'ajab kahani-kar hai ufuq ke par us taraf

lahak rahi hai dekhiye shafaq-nazhad raushni

qadim murgh-zar hai ufuq ke par us taraf

ye kis ki jeb se girin nujum ki asharfiyan

koi to mal-dar hai ufuq ke par us taraf

mujhe meri sadaon ka jawab naqd kya mile

jo hai to bas udhaar hai ufuq ke par us taraf

ufuq ke par us taraf zarur jaunga kabhi

ki mera intizar hai ufuq ke par us taraf

mujhe rida-e-surKH se yahi mughaalta hua

khaDi koi kunwar hai ufuq ke par us taraf

wahin se bund bund kuchh KHayal mujh tak aa gae

suKHan ka aabshaar hai ufuq ke par us taraf

idhar udhar hi ghumte rahoge ‘yawar-e-‘azim'

na aar hai na par hai ufuq ke par us taraf