wo mere sath chala sar se dhup Dhalne tak

vo mere saath chalā sar se dhuup Dhalne tak

havā bhī dost rahī bas charāġh jalne tak

kise ḳhabar thī ki sūraj ko shaam Das legī

hamāre barf se dil meñ lahū pighalne tak

jalā jab apnā hī ghar apne sāmne to khulā

hamārī koshisheñ saarī haiñ haath malne tak

batā mujhe mire hamdam tū sochtā kyā hai

maiñ bā-vafā huuñ faqat ruḳh tirā badalne tak

jahān-e-vaqt kī rau meñ the sañg kī sūrat

qadam qadam pe lagīñ Thokareñ sambhalne tak

sadā-e-tīrgī 'sattār' sun rahā huuñ maiñ

mirā charāġh hai raushan lahū ke jalne tak

wo mere sath chala sar se dhup Dhalne tak

hawa bhi dost rahi bas charagh jalne tak

kise KHabar thi ki suraj ko sham Das legi

hamare barf se dil mein lahu pighalne tak

jala jab apna hi ghar apne samne to khula

hamari koshishen sari hain hath malne tak

bata mujhe mere hamdam tu sochta kya hai

main ba-wafa hun faqat ruKH tera badalne tak

jahan-e-waqt ki rau mein the sang ki surat

qadam qadam pe lagin Thokaren sambhalne tak

sada-e-tirgi 'sattar' sun raha hun main

mera charagh hai raushan lahu ke jalne tak