wo mere zehn pe itna sawar ho gaya tha

vo mere zehn pe itnā savār ho gayā thā

maiñ kam-sinī meñ junūñ kā shikār ho gayā thā

karegā kaun tirī vus.atoñ kā andāza

jo ham-kanār huā be-kanār ho gayā thā

tamām umr phir apnī talāsh meñ guzrī

maiñ apne aap se ik din farār ho gayā thā

mujhe gañvā ke liyā dil ne sūjh-būjh se kaam

fuzūl-ḳharch kifāyat-shi.ār ho gayā thā

bhaTak rahā thā koī sar-phirī havāoñ meñ

phir is ke ba.ad supurd-e-ġhubār ho gayā thā

milī thī maañ kī ġhulāmī se ye sar-afrāzī

ki bādshāhoñ meñ merā shumār ho gayā thā

mujhe bhī achchhe bure kī shanāḳht ho ga.ī thī

'nasīm' jin dinoñ be-rozgār ho gayā thā

wo mere zehn pe itna sawar ho gaya tha

main kam-sini mein junun ka shikar ho gaya tha

karega kaun teri wusaton ka andaza

jo ham-kanar hua be-kanar ho gaya tha

tamam umr phir apni talash mein guzri

main apne aap se ek din farar ho gaya tha

mujhe ganwa ke liya dil ne sujh-bujh se kaam

fuzul-KHarch kifayat-shiar ho gaya tha

bhaTak raha tha koi sar-phiri hawaon mein

phir is ke baad supurd-e-ghubar ho gaya tha

mili thi man ki ghulami se ye sar-afraazi

ki baadshahon mein mera shumar ho gaya tha

mujhe bhi achchhe bure ki shanaKHt ho gai thi

'nasim' jin dinon be-rozgar ho gaya tha