wo mila to husn ke wo sare paikar mil gae

vo milā to husn ke vo saare paikar mil ga.e

merī khoī zindagī ke saare manzar mil ga.e

'umr bhar karte rahe ham log paanī kī talāsh

zindagī kī ret par sūkhe samundar mil ga.e

ai akaḌ kar chalne vaale bas tū itnā soch le

is zamīñ kī ḳhaak meñ kitne sikandar mil ga.e

vaqt ko phūloñ ke jaise ham ne paalā thā magar

kis liye phir vaqt ke hāthoñ meñ ḳhanjar mil ga.e

jab se ham is kārvān-e-bazm meñ dāḳhil hue

kyā batā.eñ kaise kaise phir suḳhanvar mil ga.e

ham jahāñ kī mushkiloñ se 'umr bhar laḌte rahe

zaḳhm DhūñDe to vo mere dil ke andar mil ga.e

aaj jitne hukmarāñ haiñ un kā maazī dekh kar

jā.eza ham ne liyā to saare naukar mil ga.e

vo bhalā.ī kā zamāna jā chukā 'minhāj' ab

muflisī kī raah meñ saare sitamgar mil ga.e

wo mila to husn ke wo sare paikar mil gae

meri khoi zindagi ke sare manzar mil gae

'umr bhar karte rahe hum log pani ki talash

zindagi ki ret par sukhe samundar mil gae

ai akaD kar chalne wale bas tu itna soch le

is zamin ki KHak mein kitne sikandar mil gae

waqt ko phulon ke jaise hum ne pala tha magar

kis liye phir waqt ke hathon mein KHanjar mil gae

jab se hum is karwan-e-bazm mein daKHil hue

kya bataen kaise kaise phir suKHanwar mil gae

hum jahan ki mushkilon se 'umr bhar laDte rahe

zaKHm DhunDe to wo mere dil ke andar mil gae

aaj jitne hukmaran hain un ka mazi dekh kar

jaeza hum ne liya to sare naukar mil gae

wo bhalai ka zamana ja chuka 'minhaj' ab

muflisi ki rah mein sare sitamgar mil gae