wo mera aks hai saya hai ki paikar kya hai

vo mirā aks hai saaya hai ki paikar kyā hai

maiñ nahīñ huuñ to mire qad ke barābar kyā hai

har-nafas zehn meñ uThtā huā mahshar kyā hai

mauj-dar-mauj mire jism ke andar kyā hai

band āñkhoñ se bhī dekho kabhī ā.īne ko

ḳhud samajh loge ki ehsās kā patthar kyā hai

dard ke ek hī jhoñke ne uThāyā tūfāñ

kis ko ma.alūm ki yādoñ kā samundar kyā hai

qaid kar rakkhā hai lamhāt kī dīvāroñ ne

un se niklūñ to zarā dekhūñ ki bāhar kyā hai

jis ko dekho vahī patthar hai liye hāthoñ meñ

dekhnā ye hai ki shīshe kā muqaddar kyā hai

ik sanam roz tarāshā aur use toḌ diyā

zehn-e-insāñ hai 'brāhīm' ki 'āzar' kyā hai

jhiil meñ hañstā huā nanhā sā ma.asūm kañval

kitnā manzar hai suhānā pas-e-manzar kyā hai

apnī hī aag meñ har lamha sulagte rahnā

aur fankār kī taqdīr meñ 'jauhar' kyā hai

wo mera aks hai saya hai ki paikar kya hai

main nahin hun to mere qad ke barabar kya hai

har-nafas zehn mein uThta hua mahshar kya hai

mauj-dar-mauj mere jism ke andar kya hai

band aankhon se bhi dekho kabhi aaine ko

KHud samajh loge ki ehsas ka patthar kya hai

dard ke ek hi jhonke ne uThaya tufan

kis ko malum ki yaadon ka samundar kya hai

qaid kar rakkha hai lamhat ki diwaron ne

un se niklun to zara dekhun ki bahar kya hai

jis ko dekho wahi patthar hai liye hathon mein

dekhna ye hai ki shishe ka muqaddar kya hai

ek sanam roz tarasha aur use toD diya

zehn-e-insan hai 'brahim' ki 'azar' kya hai

jhil mein hansta hua nanha sa masum kanwal

kitna manzar hai suhana pas-e-manzar kya hai

apni hi aag mein har lamha sulagte rahna

aur fankar ki taqdir mein 'jauhar' kya hai