wo mera kyon na ham-safar nikla

vo mirā kyoñ na ham-safar niklā

ḳhvāb aur itnā muḳhtasar niklā

saarī duniyā ko ho gayā mā'lūm

bas vahī ek be-ḳhabar niklā

ek chehra rahā nazar meñ mirī

chhoḌ kar vo mujhe kidhar niklā

ek darvāza band andar se

aur khiḌkī se ek sar niklā

sar uThāyā to āsmān thā bas

sar jhukāyā to merā ghar niklā

aanā hotā to aa ga.e hote

raat kā ab to ik pahar niklā

ab batā lauT kar kahāñ jā.ūñ

ye nagar bhī vahī nagar niklā

ye zarūrat kahāñ pe le aa.ī

har safar meñ nayā safar niklā

ḳhuun thūkā to kyā huā hāsil

ye hunar bhī to be-hunar niklā

ham ne jo rāsta chunā thā 'samīr'

koī rasta na phir idhar niklā

wo mera kyon na ham-safar nikla

KHwab aur itna muKHtasar nikla

sari duniya ko ho gaya ma'lum

bas wahi ek be-KHabar nikla

ek chehra raha nazar mein meri

chhoD kar wo mujhe kidhar nikla

ek darwaza band andar se

aur khiDki se ek sar nikla

sar uThaya to aasman tha bas

sar jhukaya to mera ghar nikla

aana hota to aa gae hote

raat ka ab to ek pahar nikla

ab bata lauT kar kahan jaun

ye nagar bhi wahi nagar nikla

ye zarurat kahan pe le aai

har safar mein naya safar nikla

KHun thuka to kya hua hasil

ye hunar bhi to be-hunar nikla

hum ne jo rasta chuna tha 'samir'

koi rasta na phir idhar nikla