wo mere dil ki raushni wo mere dagh le gai

vo mire dil kī raushnī vo mire daaġh le ga.ī

aisī chalī havā-e-shām saare charāġh le ga.ī

shāḳh o gul o samar kī baat kaun kare ki ek raat

bād-e-shimāl aa.ī thī baaġh kā baaġh le ga.ī

vaqt kī mauj tund-rau aa.ī thī sū-e-mai-kada

merī sharāb pheñk kar mere ayāġh le ga.ī

dil kā hisāb kyā kareñ dil to usī kā maal thā

nik.hat-e-zulf-e-ambarīñ ab ke dimāġh le ga.ī

baaġh thā us meñ hauz thā hauz thā us meñ phuul thā

ġhair kī be-basīratī mujh se surāġh le ga.ī

wo mere dil ki raushni wo mere dagh le gai

aisi chali hawa-e-sham sare charagh le gai

shaKH o gul o samar ki baat kaun kare ki ek raat

baad-e-shimal aai thi bagh ka bagh le gai

waqt ki mauj tund-rau aai thi su-e-mai-kada

meri sharab phenk kar mere ayagh le gai

dil ka hisab kya karen dil to usi ka mal tha

nikhat-e-zulf-e-ambarin ab ke dimagh le gai

bagh tha us mein hauz tha hauz tha us mein phul tha

ghair ki be-basirati mujh se suragh le gai