wo meri chahat na wo unki adaen rah gain

vo mirī chāhat na vo un kī adā.eñ rah ga.iiñ

zehn meñ kuchh ḳhūbsūrat kalpanāeñ rah ga.iiñ

jis qadar fānūs the nazr-e-havādis ho ga.e

ab charāġhoñ kī hifāzat meñ havā.eñ rah ga.iiñ

apnī barbādī kā afsāna sunāne ke liye

chand sūkhī Dāliyāñ kuchh fāḳhtā.eñ rah ga.iiñ

chashm-o-abrū āriz-o-lab ishva-o-nāz-o-adā

ik mire dil ke liye saarī balā.eñ rah ga.iiñ

māl-o-zar to bhā.iyoñ ne kar liye taqsīm sab

mere hisse meñ faqat maañ kī duā.eñ rah ga.iiñ

TūTte jaate haiñ rishte dharm aur vishvās ke

bas numā.ish ke liye ab āsthā.eñ rah ga.iiñ

lā.eq-e-e.azāz gardāne ga.e ahl-e-jafā

sard baste meñ mirī saarī vafā.eñ rah ga.iiñ

kaun suntā hai yahāñ harf-e-basīrat ai 'nadīm'

dil kī bāteñ ho ke gumbad kī sadā.eñ rah ga.iiñ

wo meri chahat na wo un ki adaen rah gain

zehn mein kuchh KHubsurat kalpanaen rah gain

jis qadar fanus the nazr-e-hawadis ho gae

ab charaghon ki hifazat mein hawaen rah gain

apni barbaadi ka afsana sunane ke liye

chand sukhi Daliyan kuchh faKHtaen rah gain

chashm-o-abru aariz-o-lab ishwa-o-naz-o-ada

ek mere dil ke liye sari balaen rah gain

mal-o-zar to bhaiyon ne kar liye taqsim sab

mere hisse mein faqat man ki duaen rah gain

TuTte jate hain rishte dharm aur wishwas ke

bas numaish ke liye ab aasthaen rah gain

laeq-e-eazaz gardane gae ahl-e-jafa

sard baste mein meri sari wafaen rah gain

kaun sunta hai yahan harf-e-basirat ai 'nadim'

dil ki baaten ho ke gumbad ki sadaen rah gain