wo mujhe soz-e-tamanna ki tapish samjha gaya

vo mujhe soz-e-tamannā kī tapish samjhā gayā

mom kā paikar samajh kar dhuup meñ Thahrā gayā

us kī bazm-e-gul haiñ apne ḳhāna-e-vīrāñ kī samt

maiñ misāl-e-abr aayā sūrat-e-sahrā gayā

thā amīr-e-shahr gar apnī jagah bar-haq to phir

ā.īna jab sāmne aayā to kyuuñ ghabrā gayā

ab koī saffāk duniyā ke ġhamoñ kā ġham nahīñ

ham ko terā ġham samajhne kā salīqa aa gayā

kis se dekhā jā.egā us kā jamāl-e-nau-ba-nau

ek jalva hī nigāh-e-shauq ko pathrā gayā

bāzī-e-dil ham ne yuuñ khelī bisāt dahr par

shah pe shah paḌtī rahī har shah pe ik mohara gayā

chaḌhte sūraj ke pujārī kal ke sūraj ko na bhuul

vo bhī sūraj thā yuuñ hī niklā chaḌhā utrā gayā

ab na vo mushtāq nazreñ haiñ na vo betāb dil

be-mahābā aa.e sāñsoñ kā vo pahrā gayā

kuchh ajab thā terī bazm-e-nāz meñ 'aḳhgar' kā haal

aaj us ko der tak kuchh sochtā dekhā gayā

wo mujhe soz-e-tamanna ki tapish samjha gaya

mom ka paikar samajh kar dhup mein Thahra gaya

us ki bazm-e-gul hain apne KHana-e-viran ki samt

main misal-e-abr aaya surat-e-sahra gaya

tha amir-e-shahr gar apni jagah bar-haq to phir

aaina jab samne aaya to kyun ghabra gaya

ab koi saffak duniya ke ghamon ka gham nahin

hum ko tera gham samajhne ka saliqa aa gaya

kis se dekha jaega us ka jamal-e-nau-ba-nau

ek jalwa hi nigah-e-shauq ko pathra gaya

bazi-e-dil hum ne yun kheli bisat dahr par

shah pe shah paDti rahi har shah pe ek mohara gaya

chaDhte suraj ke pujari kal ke suraj ko na bhul

wo bhi suraj tha yun hi nikla chaDha utra gaya

ab na wo mushtaq nazren hain na wo betab dil

be-mahaba aae sanson ka wo pahra gaya

kuchh ajab tha teri bazm-e-naz mein 'aKHgar' ka haal

aaj us ko der tak kuchh sochta dekha gaya