wo nam zahr ka rakh den dawa to kya hoga

vo naam zahr kā rakh deñ davā to kyā hogā

kaheñ jo ḳhuun ko rañg-e-hinā to kyā hogā

chaman kī samt chalā to hai kārvān-e-bahār

jo rāhzan hī hue rahnumā to kyā hogā

harīf-e-sail-e-havādis to hai safīna-e-qaum

jo nazr-e-mauj huā nā-ḳhudā to kyā hogā

taras rahā hai zamāna sukūn-e-dil ke liye

sukūn-e-dil na mayassar huā to kyā hogā

chaman ke ishq meñ ahl-e-vafā ye bhuul ga.e

badal ga.ī jo chaman kī fazā to kyā hogā

guzar rahī haiñ nigāheñ had-e-tajassus se

milā na koī jo dard-āshnā to kyā hogā

hamārā ḳhuun thā shādābī-e-chaman kā sabab

jo ye chaman ke na kaam aa sakā to kyā hogā

ġham-e-hayāt se yuuñ to haiñ ashk-bār āñkheñ

nazar se ḳhuun Tapakne lagā to kyā hogā

bayāñ karūñ to sahī un kī dāstān-e-sitam

vo ho ga.e use san kar ḳhafā to kyā hogā

bas ik nigāh-e-karam tak hai zindagī kā nashāt

jo ye bhī TuuT gayā aasrā to kyā hogā

abhī hai mohlat-e-husn-e-amal uTho 'zauqī'

javāb dene lage dast-o-pā to kyā hogā

wo nam zahr ka rakh den dawa to kya hoga

kahen jo KHun ko rang-e-hina to kya hoga

chaman ki samt chala to hai karwan-e-bahaar

jo rahzan hi hue rahnuma to kya hoga

harif-e-sail-e-hawadis to hai safina-e-qaum

jo nazr-e-mauj hua na-KHuda to kya hoga

taras raha hai zamana sukun-e-dil ke liye

sukun-e-dil na mayassar hua to kya hoga

chaman ke ishq mein ahl-e-wafa ye bhul gae

badal gai jo chaman ki faza to kya hoga

guzar rahi hain nigahen had-e-tajassus se

mila na koi jo dard-ashna to kya hoga

hamara KHun tha shadabi-e-chaman ka sabab

jo ye chaman ke na kaam aa saka to kya hoga

gham-e-hayat se yun to hain ashk-bar aankhen

nazar se KHun Tapakne laga to kya hoga

bayan karun to sahi un ki dastan-e-sitam

wo ho gae use san kar KHafa to kya hoga

bas ek nigah-e-karam tak hai zindagi ka nashat

jo ye bhi TuT gaya aasra to kya hoga

abhi hai mohlat-e-husn-e-amal uTho 'zauqi'

jawab dene lage dast-o-pa to kya hoga