wo nata toDte hain aur gila bhi karte hain

vo naatā toḌte haiñ aur gila bhī karte haiñ

nahīñ mileñge ye kah kar milā bhī karte haiñ

tamām umr hī apnī rafū-garī meñ ga.ī

ye zaḳhm haiñ ye yaqīñ thā silā bhī karte haiñ

bichhaḌ ga.e jo kahāñ un kī aas ho koī

magar jo kah ke ye jaa.eñ milā bhī karte haiñ

haiñ kaise ham ki jo qurbān haiñ tasalsul se

haiñ kaise vo ki jo ham se gila bhī karte haiñ

kahā bhī thā yahī un se ḳhizāñ abhī tak hai

ḳhizāñ rutoñ meñ bhalā gul khilā bhī karte haiñ

kahīñ ho jā.eñge bebas rivāyatoñ ke amiiñ

kabhī pahāḌ jagah se hilā bhī karte haiñ

hai rāhguzār hī aisī ye pyaar kī 'āmir'

basar ho ḳhaak meñ paañv chhilā bhī karte haiñ

wo nata toDte hain aur gila bhi karte hain

nahin milenge ye kah kar mila bhi karte hain

tamam umr hi apni rafu-gari mein gai

ye zaKHm hain ye yaqin tha sila bhi karte hain

bichhaD gae jo kahan un ki aas ho koi

magar jo kah ke ye jaen mila bhi karte hain

hain kaise hum ki jo qurban hain tasalsul se

hain kaise wo ki jo hum se gila bhi karte hain

kaha bhi tha yahi un se KHizan abhi tak hai

KHizan ruton mein bhala gul khila bhi karte hain

kahin ho jaenge bebas riwayaton ke amin

kabhi pahaD jagah se hila bhi karte hain

hai rahguzar hi aisi ye pyar ki 'amir'

basar ho KHak mein panw chhila bhi karte hain