wo nazuk sa tabassum rah gaya wahm-e-hasin ban kar

vo nāzuk sā tabassum rah gayā vahm-e-hasīñ ban kar

numāyāñ ho gayā zauq-e-sitam chīn-e-jabīñ ban kar

bahut itrā rahī hai raat zulf-e-ambarīñ ban kar

bahut maġhrūr hai nūr-e-sahar rañg-e-jabīñ ban kar

mirī jāma-darī ne raaz ye kholā zamāne par

ḳhirad dhoke diyā kartī hai jaib o āstīñ ban kar

karam meñ bhī magar ik ġhamza-e-ḳhūñ-rez shāmil thā

nigāhoñ kī taraf uTThī to dil kī nukta-chīñ ban kar

mirī dīvāngī thī ik sharār-e-ārzū dil meñ

baḌhī to daar par raushan huī sham-e-yaqīñ ban kar

payām aate rahe aksar kisī mahv-e-taġhāful ke

adā-e-bar-malā ban kar nigāh-e-sharmagīñ ban kar

vo ik sajda na ho paayā jo barbād-e-haram 'tābāñ'

jabīn-e-shauq par raushan hai pindār-e-jabīñ ban kar

wo nazuk sa tabassum rah gaya wahm-e-hasin ban kar

numayan ho gaya zauq-e-sitam chin-e-jabin ban kar

bahut itra rahi hai raat zulf-e-ambarin ban kar

bahut maghrur hai nur-e-sahar rang-e-jabin ban kar

meri jama-dari ne raaz ye khola zamane par

KHirad dhoke diya karti hai jaib o aastin ban kar

karam mein bhi magar ek ghamza-e-KHun-rez shamil tha

nigahon ki taraf uTThi to dil ki nukta-chin ban kar

meri diwangi thi ek sharar-e-arzu dil mein

baDhi to dar par raushan hui sham-e-yaqin ban kar

payam aate rahe aksar kisi mahw-e-taghaful ke

ada-e-bar-mala ban kar nigah-e-sharmagin ban kar

wo ek sajda na ho paya jo barbaad-e-haram 'taban'

jabin-e-shauq par raushan hai pindar-e-jabin ban kar