wo naKHl jo bar-war hue hain

vo naḳhl jo bār-var hue haiñ

āshob-e-ḳhizāñ se Dar rahe haiñ

shāḳhoñ pe tiir ke zaḳhm haiñ ye

yā phir se gulāb jhāñkte haiñ

zulmat meñ bahut hī yaad aa.e

vo chāñd jo ham-safar rahe haiñ

le dast-e-havas ye phuul tere

kāñTe to vafā ne chun liye haiñ

badlā na navishta-e-maqdūr

maktūb to ham ne bhī likhe haiñ

pāmāl-e-jahāñ hue ki ham ne

kuchh ḳhvāb jahāñ ko bhī diye haiñ

TuuTī hai kahīñ sadā kī zanjīr

halqe se ḳhayāl ke paḌe haiñ

sahrā kā sukūt kah rahā hai

shahroñ ke charāġh bujh ga.e haiñ

ai ishq-e-junūñ-shi.ār tere

duniyā meñ ajiib silsile haiñ

chamkī hai jo sarnavisht-e-ādam

tahzīb ke naqsh ban ga.e haiñ

āfāq kī vus.atoñ se aage

kuchh aur charāġh jal uThe haiñ

insāñ kā shu.ūr kah rahā hai

insāñ ne bahut se dukh sahe haiñ

wo naKHl jo bar-war hue hain

aashob-e-KHizan se Dar rahe hain

shaKHon pe tir ke zaKHm hain ye

ya phir se gulab jhankte hain

zulmat mein bahut hi yaad aae

wo chand jo ham-safar rahe hain

le dast-e-hawas ye phul tere

kanTe to wafa ne chun liye hain

badla na nawishta-e-maqdur

maktub to hum ne bhi likhe hain

pamal-e-jahan hue ki hum ne

kuchh KHwab jahan ko bhi diye hain

TuTi hai kahin sada ki zanjir

halqe se KHayal ke paDe hain

sahra ka sukut kah raha hai

shahron ke charagh bujh gae hain

ai ishq-e-junun-shiar tere

duniya mein ajib silsile hain

chamki hai jo sarnawisht-e-adam

tahzib ke naqsh ban gae hain

aafaq ki wusaton se aage

kuchh aur charagh jal uThe hain

insan ka shuur kah raha hai

insan ne bahut se dukh sahe hain