wo naqsh-e-qadam mehwar-o-maqsud hain mere

vo naqsh-e-qadam mehvar-o-maqsūd haiñ mere

maulā hue ka.abe meñ jo maulūd haiñ mere

mere liye mānūs hai vo maut kī vaadī

kuchh log vahāñ pahle hī maujūd haiñ mere

us rūh-e-tamanna kī mahak tak huī ruḳhsat

baaqī jo bache saañs vo be-sūd haiñ mere

chehra hai ye kis kā mire chehre kī jagah par

ā.īnoñ ke ā.īne hī masdūd haiñ mere

āñkheñ jo khulīñ dekhā sukūt-e-ajal-e-ḳhvāb

thā shor sitāre baḌe mas.ūd haiñ mere

garche huuñ gunahgār magar un kā gadā huuñ

ḳhush huuñ ki saḳhī ahmad-o-mahmūd haiñ mere

ma.asūm haiñ aur koī ḳhatā un kī nahīñ hai

mazlūm jinheñ khā gayā bārūd haiñ mere

tauhīd-mizājoñ meñ mirā naam ba-har-gām

samjhāo jinheñ vahm hai ma.abūd haiñ mere

maiñ qābil-e-rashk un ko samajhtā nahīñ 'yāsir'

jin logoñ ko da.avā hai ki mahsūd haiñ mere

wo naqsh-e-qadam mehwar-o-maqsud hain mere

maula hue kabe mein jo maulud hain mere

mere liye manus hai wo maut ki wadi

kuchh log wahan pahle hi maujud hain mere

us ruh-e-tamanna ki mahak tak hui ruKHsat

baqi jo bache sans wo be-sud hain mere

chehra hai ye kis ka mere chehre ki jagah par

aainon ke aaine hi masdud hain mere

aankhen jo khulin dekha sukut-e-ajal-e-KHwab

tha shor sitare baDe masud hain mere

garche hun gunahgar magar un ka gada hun

KHush hun ki saKHi ahmad-o-mahmud hain mere

masum hain aur koi KHata un ki nahin hai

mazlum jinhen kha gaya barud hain mere

tauhid-mizajon mein mera nam ba-har-gam

samjhao jinhen wahm hai mabud hain mere

main qabil-e-rashk un ko samajhta nahin 'yasir'

jin logon ko dawa hai ki mahsud hain mere