wo nigah mil ke nigah se ba-ada-e-KHas jhijhak gai

vo nigāh mil ke nigāh se ba-adā-e-ḳhās jhijhak ga.ī

to ba-rañg-e-ḳhūñ mirī aarzū mirī chashm-e-tar se Tapak ga.ī

kabhī ashk ban ke Dhalak ga.ī kabhī rashk ban ke jhalak ga.ī

vo sharāb jām-e-hayāt se jo shabāb ban ke chhalak ga.ī

mirī āh-e-sā.iqa-bār jab mire tūr-e-dil pe chamak ga.ī

jo zamīñ se tā-ba-falak ga.ī to falak se tā-ba-samak ga.ī

maiñ zahe-nasīb ghirā huā huuñ tajalliyoñ ke hujūm meñ

ye shuā kis ke jamāl kī mirī zulmatoñ meñ chamak ga.ī

usī be-panāh-e-nigāh kā mujhe baar baar hadaf banā

ki dil aaj jhuum ke dil banā rag-e-jāñ bhī merī phaḌak ga.ī

pas-e-dafn bhī na sukūñ milā tah-e-ḳhāk hasrat-e-ishq ko

kabhī sabza ban ke lahak uThī kabhī phuul ban ke mahak ga.ī

tirī chashm-e-mast ne sāqiyā bhare mai-kade ko bhulā diyā

kabhī yaad ban ke baras ga.ī kabhī shīsha ban ke khanak ga.ī

koī kaash aa ke 'vaqār' ke bhī shikasta saaz ko chheḌ de

vo junūñ-navāz havā chalī vo qabā-e-ġhuncha masak ga.ī

wo nigah mil ke nigah se ba-ada-e-KHas jhijhak gai

to ba-rang-e-KHun meri aarzu meri chashm-e-tar se Tapak gai

kabhi ashk ban ke Dhalak gai kabhi rashk ban ke jhalak gai

wo sharab jam-e-hayat se jo shabab ban ke chhalak gai

meri aah-e-saiqa-bar jab mere tur-e-dil pe chamak gai

jo zamin se ta-ba-falak gai to falak se ta-ba-samak gai

main zahe-nasib ghira hua hun tajalliyon ke hujum mein

ye shua kis ke jamal ki meri zulmaton mein chamak gai

usi be-panah-e-nigah ka mujhe bar bar hadaf bana

ki dil aaj jhum ke dil bana rag-e-jaan bhi meri phaDak gai

pas-e-dafn bhi na sukun mila tah-e-KHak hasrat-e-ishq ko

kabhi sabza ban ke lahak uThi kabhi phul ban ke mahak gai

teri chashm-e-mast ne saqiya bhare mai-kade ko bhula diya

kabhi yaad ban ke baras gai kabhi shisha ban ke khanak gai

koi kash aa ke 'waqar' ke bhi shikasta saz ko chheD de

wo junun-nawaz hawa chali wo qaba-e-ghuncha masak gai