wo niyaz-o-naz ke marhale nigah-o-suKHan se chale gae

vo niyāz-o-nāz ke marhale nigah-o-suḳhan se chale ga.e

tire rañg-o-bū ke vo qāfile tire pairahan se chale ga.e

koī aas hai na hirās hai shab-e-māh kitnī udaas hai

vo jo rañg rañg ke aks the vo kiran kiran se chale ga.e

koī un kī āñkheñ sarāhtā koī vahshatoñ se nibāhtā

ki vo āhuvān-e-ramīda-ḳhū ye sunā ḳhutan se chale ga.e

ka.ī mehr-o-mah utar aa.e the vo yahīñ the mere ghar aa.e the

vo kalī kalī se dar aa.e the vo chaman chaman se chale ga.e

mire dil kī āb-o-havā lagī ki vafā bhī un ko ḳhatā lagī

vahī sādgī se jo aa.e the vahī bāñkpan se chale ga.e

na to kufr ke na ḳhudā ke ham na davā ke ham na duā ke ham

ki butān-e-ka.aba-e-ārzū dil-e-barhaman se chale ga.e

ye mirā fareb-e-nazar nahīñ mire ham-qadam the yahīñ kahīñ

mujhe āhaTeñ bhī na mil sakīñ vo baḌe jatan se chale ga.e

ye bajā ki tohfa-e-jāñ liye tire paas aa.e the be piye

vo gadāgarān-e-tahī-subū tire husn-e-zan se chale ga.e

yahī tujh se apnā thā vāsta yahī thī hayāt-e-muāshqa

tirī ḳhalvatoñ ke sharīk the tirī anjuman se chale ga.e

pas-e-umr bāzū-e-shauq par sar-e-nāz thā to huī ḳhabar

ka.ī rat-jage tire gesuoñ kī shikan shikan se chale ga.e

vo bujhe bujhe vo luTe luTe sar-e-rāh 'shāz' mile to the

unheñ ab vatan meñ na DhūñDiye ki vo ab vatan se chale ga.e

wo niyaz-o-naz ke marhale nigah-o-suKHan se chale gae

tere rang-o-bu ke wo qafile tere pairahan se chale gae

koi aas hai na hiras hai shab-e-mah kitni udas hai

wo jo rang rang ke aks the wo kiran kiran se chale gae

koi un ki aankhen sarahta koi wahshaton se nibahta

ki wo aahuwan-e-ramida-KHu ye suna KHutan se chale gae

kai mehr-o-mah utar aae the wo yahin the mere ghar aae the

wo kali kali se dar aae the wo chaman chaman se chale gae

mere dil ki aab-o-hawa lagi ki wafa bhi un ko KHata lagi

wahi sadgi se jo aae the wahi bankpan se chale gae

na to kufr ke na KHuda ke hum na dawa ke hum na dua ke hum

ki butan-e-kaba-e-arzu dil-e-barhaman se chale gae

ye mera fareb-e-nazar nahin mere ham-qadam the yahin kahin

mujhe aahaTen bhi na mil sakin wo baDe jatan se chale gae

ye baja ki tohfa-e-jaan liye tere pas aae the be piye

wo gadagaran-e-tahi-subu tere husn-e-zan se chale gae

yahi tujh se apna tha wasta yahi thi hayat-e-muashqa

teri KHalwaton ke sharik the teri anjuman se chale gae

pas-e-umr bazu-e-shauq par sar-e-naz tha to hui KHabar

kai rat-jage tere gesuon ki shikan shikan se chale gae

wo bujhe bujhe wo luTe luTe sar-e-rah 'shaz' mile to the

unhen ab watan mein na DhunDiye ki wo ab watan se chale gae