wo os thi ki chandni gulab ke suragh mein

vo os thī ki chāñdnī gulāb ke surāġh meñ

savāl hī badal gayā javāb ke surāġh meñ

baras rahī thī dopahar meñ aag āsmān se

nadī kisī nagar meñ thī sahāb ke surāġh meñ

zamīñ pe ḳhema-e-safar utārne kī der thī

havā-e-tund chal paḌī tanāb ke surāġh meñ

tamām sur bikhar ga.e usī ko DhūñDte hue

jo sāhiloñ pe gum huā rubāb ke surāġh meñ

ghuTan-zada thiiñ ghāTiyāñ fazā meñ ek ḳhauf thā

shikāriyoñ kā ġhol thā 'uqāb ke surāġh meñ

taras rahā thā bastiyoñ kā husn ik nigāh ko

guzar rahe the qāfile ġhayāb ke surāġh meñ

unhī ko raushnī ke dar khule mile the ḳhaak par

nikal ga.e jo ġhaar se kitāb ke surāġh meñ

wo os thi ki chandni gulab ke suragh mein

sawal hi badal gaya jawab ke suragh mein

baras rahi thi dopahar mein aag aasman se

nadi kisi nagar mein thi sahab ke suragh mein

zamin pe KHema-e-safar utarne ki der thi

hawa-e-tund chal paDi tanab ke suragh mein

tamam sur bikhar gae usi ko DhunDte hue

jo sahilon pe gum hua rubab ke suragh mein

ghuTan-zada thin ghaTiyan faza mein ek KHauf tha

shikariyon ka ghol tha 'uqab ke suragh mein

taras raha tha bastiyon ka husn ek nigah ko

guzar rahe the qafile ghayab ke suragh mein

unhi ko raushni ke dar khule mile the KHak par

nikal gae jo ghaar se kitab ke suragh mein