wo pak ism wazifa karo asar aae

vo paak ism vazīfa karo asar aa.e

abhī zamīn ke siine kā zaḳhm bhar aa.e

fazā meñ sabz parindoñ kā chahchahā hai bahut

koī parind mirī chhat pe bhī utar aa.e

agarche shahr meñ kuchh aise nāmvar bhī na the

magar vo naam ki duniyā meñ naam kar aa.e

sunā hai garm-bayānī se kuchh nahīñ hotā

diloñ se ho ke mohabbat zabān par aa.e

mahak to sakte haiñ pathrīlī vādiyoñ meñ gulāb

magar ye shart hai kuchh haath meñ hunar aa.e

vo naqsh-e-pā mirī āñkhoñ ko raas aa jaatā

maiñ chāhtā huuñ mujhe bhī mirī ḳhabar aa.e

use maiñ chhoḌ duuñ mujh se ye ho nahīñ saktā

mirī hathelī pe ḳhurshīd bhī utar aa.e

qadam qadam pe ujāle chhalak rahe haiñ magar

ḳhudā kare ki tabī'at bhī raah par aa.e

kisī ke qurb kī lazzat 'ra.īs' kyā kahnā

ġham-e-hayāt kī manzil se jab guzar aa.e

wo pak ism wazifa karo asar aae

abhi zamin ke sine ka zaKHm bhar aae

faza mein sabz parindon ka chahchaha hai bahut

koi parind meri chhat pe bhi utar aae

agarche shahr mein kuchh aise namwar bhi na the

magar wo nam ki duniya mein nam kar aae

suna hai garm-bayani se kuchh nahin hota

dilon se ho ke mohabbat zaban par aae

mahak to sakte hain pathrili wadiyon mein gulab

magar ye shart hai kuchh hath mein hunar aae

wo naqsh-e-pa meri aankhon ko ras aa jata

main chahta hun mujhe bhi meri KHabar aae

use main chhoD dun mujh se ye ho nahin sakta

meri hatheli pe KHurshid bhi utar aae

qadam qadam pe ujale chhalak rahe hain magar

KHuda kare ki tabi'at bhi rah par aae

kisi ke qurb ki lazzat 'rais' kya kahna

gham-e-hayat ki manzil se jab guzar aae