wo pahli si chashm-e-murawwat nahin hai

vo pahlī sī chashm-e-muravvat nahīñ hai

vo aglī sī mujh par ināyat nahīñ hai

ulajhne kī ġhairoñ se aadat nahīñ hai

karūñ kyā mirī aisī fitrat nahīñ hai

jo tujh meñ bhalā.ī hai vo bhī kahūñgā

mujhe tujh se nāseh adāvat nahīñ hai

jafā-o-sitam zulm sab kuchh haiñ tum meñ

agar hai to ik ādamiyyat nahīñ hai

buto va.ada kar lo abhī ḳhauf kyā hai

abhī aatī jaatī qayāmat nahīñ hai

satāte haiñ ye but kuchh is tarah jaise

kabhī aane vaalī qayāmat nahīñ hai

tire hijr meñ sar pe kyā kuchh nahīñ hai

musībat nahīñ hai ki aafat nahīñ hai

hamīñ ne to dil saikḌoñ ḳhuuñ kiye haiñ

hamīñ ko to is par nadāmat nahīñ hai

mujhe hijr kā sadma kis shab nahīñ hai

mire sar pe kis roz aafat nahīñ hai

koī ḳhūb-rū kyā satā.egā mujh ko

'fahīm' ab vo apnī tabī.at nahīñ hai

'fahīm' aise zālim ko de baiThe dil tum

kaho kyā hai gar ye himāqat nahīñ hai

wo pahli si chashm-e-murawwat nahin hai

wo agli si mujh par inayat nahin hai

ulajhne ki ghairon se aadat nahin hai

karun kya meri aisi fitrat nahin hai

jo tujh mein bhalai hai wo bhi kahunga

mujhe tujh se naseh adawat nahin hai

jafa-o-sitam zulm sab kuchh hain tum mein

agar hai to ek aadamiyyat nahin hai

buto wada kar lo abhi KHauf kya hai

abhi aati jati qayamat nahin hai

satate hain ye but kuchh is tarah jaise

kabhi aane wali qayamat nahin hai

tere hijr mein sar pe kya kuchh nahin hai

musibat nahin hai ki aafat nahin hai

hamin ne to dil saikDon KHun kiye hain

hamin ko to is par nadamat nahin hai

mujhe hijr ka sadma kis shab nahin hai

mere sar pe kis roz aafat nahin hai

koi KHub-ru kya sataega mujh ko

'fahim' ab wo apni tabiat nahin hai

'fahim' aise zalim ko de baiThe dil tum

kaho kya hai gar ye himaqat nahin hai