wo parda zinat-e-dar ke siwa kuchh aur nahin

vo parda zīnat-e-dar ke sivā kuchh aur nahīñ

hamāre husn-e-nazar ke sivā kuchh aur nahīñ

surāġh-e-kāhkashāñ ahl-e-dil ko mil hī gayā

tumhārī rāhguzar ke sivā kuchh aur nahīñ

na jaane kaun sā īfā-e-ahd kā din ho

tumheñ to shām-o-sahar ke sivā kuchh aur nahīñ

murādeñ ishq meñ sab ko mileñ magar mujh ko

nasīb dard-e-jigar ke sivā kuchh aur nahīñ

ye kis tilism meñ mujh ko hayāt le aa.ī

jahāñ fareb-e-nazar ke sivā kuchh aur nahīñ

na pūchhiye mirī nākāmī-e-manāzil-e-shauq

husūl-e-gard-e-safar ke sivā kuchh aur nahīñ

vo nā-murād mohabbat huuñ jis ke dāman meñ

sarishk-e-dīda-e-tar ke sivā kuchh aur nahīñ

hayāt-e-ishq kī rūdād kyā kahūñ ai 'saif'

azāb-e-shām-o-sahar ke sivā kuchh aur nahīñ

wo parda zinat-e-dar ke siwa kuchh aur nahin

hamare husn-e-nazar ke siwa kuchh aur nahin

suragh-e-kahkashan ahl-e-dil ko mil hi gaya

tumhaari rahguzar ke siwa kuchh aur nahin

na jaane kaun sa ifa-e-ahd ka din ho

tumhein to sham-o-sahar ke siwa kuchh aur nahin

muraden ishq mein sab ko milen magar mujh ko

nasib dard-e-jigar ke siwa kuchh aur nahin

ye kis tilism mein mujh ko hayat le aai

jahan fareb-e-nazar ke siwa kuchh aur nahin

na puchhiye meri nakaami-e-manazil-e-shauq

husul-e-gard-e-safar ke siwa kuchh aur nahin

wo na-murad mohabbat hun jis ke daman mein

sarishk-e-dida-e-tar ke siwa kuchh aur nahin

hayat-e-ishq ki rudad kya kahun ai 'saif'

azab-e-sham-o-sahar ke siwa kuchh aur nahin