wo qarib bhi hain to kya hua hamein apne kaam se kaam hai

vo qarīb bhī haiñ to kyā huā hameñ apne kaam se kaam hai

vahī justujū vahī be-ḳhudī vahī zindagī kā nizām hai

talab irtiqā kī asaas hai ki ġham-e-asīrī kā naam hai

ki jahāñ chaman hai vahīñ qafas jahāñ daana hai vahīñ daam hai

hama-vaqt mujh ko yahī hai ġham ki unheñ hai merā ḳhayāl kam

magar is kī fikr kabhī nahīñ ki mirā junūñ bhī to ḳhaam hai

mujhe mai-kade meñ kisī ne kal ye batāyā maslak-e-āshiqī

jise baada vaj.h-e-surūr ho use baada piinā harām hai

ye hai shān-e-mahfil-e-āshiqī ki tavīl arsa guzar ke bhī

vahī but-kade kī sī sub.h hai vahī mai-kade kī sī shaam hai

ye hai kaisā ālam-e-be-ḳhudī nahīñ hosh un kī razā kā bhī

jo yahī hai 'kaif' junūn-e-ġham to junūn-e-ġham ko salām hai

wo qarib bhi hain to kya hua hamein apne kaam se kaam hai

wahi justuju wahi be-KHudi wahi zindagi ka nizam hai

talab irtiqa ki asas hai ki gham-e-asiri ka nam hai

ki jahan chaman hai wahin qafas jahan dana hai wahin dam hai

hama-waqt mujh ko yahi hai gham ki unhen hai mera KHayal kam

magar is ki fikr kabhi nahin ki mera junun bhi to KHam hai

mujhe mai-kade mein kisi ne kal ye bataya maslak-e-ashiqi

jise baada wajh-e-surur ho use baada pina haram hai

ye hai shan-e-mahfil-e-ashiqi ki tawil arsa guzar ke bhi

wahi but-kade ki si subh hai wahi mai-kade ki si sham hai

ye hai kaisa aalam-e-be-KHudi nahin hosh un ki raza ka bhi

jo yahi hai 'kaif' junun-e-gham to junun-e-gham ko salam hai