wo rang-o-bu hai ki aankhon ko sujhta bhi nahin

vo rañg-o-bū hai ki āñkhoñ ko sūjhtā bhī nahīñ

vo phuul dil meñ makīñ hai ki jo khilā bhī nahīñ

ye terī yaad ki dil se panāh māñgtī hai

ye dil ki jis se nikalne kā rāsta bhī nahīñ

jo mujh ko DhūñD rahā thā mire makān se duur

vo mere dil meñ makīñ ho ke boltā bhī nahīñ

kabhī kabhī to havas sub.h-dam uchhāltī hai

vo ashk jin meñ koī gauhar-e-vafā bhī nahīñ

ham apnī khoj meñ aisī jagah nikal aa.e

vo mil gayā ki jo kahiye ki thā to thā bhī nahīñ

har aañkh barf huī jā rahī hai hasrat se

qarīb-o-dūr koī sho.ala-e-hinā bhī nahīñ

vo jis ke ruḳh pe zabāñ haiñ baḌī baḌī āñkheñ

koī qarīb se guzre to dekhtā bhī nahīñ

mirī hī god meñ hai aur mujhī se pūchhtā hai

vo naam kyā hai ki jo tujh ko bhūltā bhī nahīñ

maiñ terā dard samajh lūñgā kyūñki tujh sā huuñ

na hañs sake to mirī tarah muskurā bhī nahīñ

shab-e-firāq sahī us kī aañkh to lag jaa.e

vo aah kījiye kaise ki jo ravā bhī nahīñ

wo rang-o-bu hai ki aankhon ko sujhta bhi nahin

wo phul dil mein makin hai ki jo khila bhi nahin

ye teri yaad ki dil se panah mangti hai

ye dil ki jis se nikalne ka rasta bhi nahin

jo mujh ko DhunD raha tha mere makan se dur

wo mere dil mein makin ho ke bolta bhi nahin

kabhi kabhi to hawas subh-dam uchhaalti hai

wo ashk jin mein koi gauhar-e-wafa bhi nahin

hum apni khoj mein aisi jagah nikal aae

wo mil gaya ki jo kahiye ki tha to tha bhi nahin

har aankh barf hui ja rahi hai hasrat se

qarib-o-dur koi shoala-e-hina bhi nahin

wo jis ke ruKH pe zaban hain baDi baDi aankhen

koi qarib se guzre to dekhta bhi nahin

meri hi god mein hai aur mujhi se puchhta hai

wo nam kya hai ki jo tujh ko bhulta bhi nahin

main tera dard samajh lunga kyunki tujh sa hun

na hans sake to meri tarah muskura bhi nahin

shab-e-firaq sahi us ki aankh to lag jae

wo aah kijiye kaise ki jo rawa bhi nahin