wo rind kya ki jo pite hain be-KHudi ke liye

vo rind kyā ki jo piite haiñ be-ḳhudī ke liye

surūr chāhiye vo bhī kabhī kabhī ke liye

ye kyā ki bazm meñ sham.eñ jalā ke baiThe ho

kabhī milo to sar-e-rāh dushmanī ke liye

avadh kī shaam rafīqoñ ko mah-jabīnoñ ko

har ek chhoḌ ke aa.e the bamba.ī ke liye

magar ye kyā ki ba-juz-dard kuchh hameñ na milā

ajiib shahr hai ye ek ajnabī ke liye

hazār chāheñ na chūTegī ham se ye duniyā

yahīñ raheñge mohabbat kī be-kasī ke liye

koī panāh nahīñ koī jā-e-amn nahīñ

hayāt johd-e-musalsal hai aadmī ke liye

ye kah rahā hai koī apne jāñ-nisāroñ se

kuchh aur chāhiye ab rasm-e-āshiqī ke liye

kahāñ kahāñ na pukārā kahāñ kahāñ na ga.e

bas ik tabassum-e-pinhāñ kī raushnī ke liye

wo rind kya ki jo pite hain be-KHudi ke liye

surur chahiye wo bhi kabhi kabhi ke liye

ye kya ki bazm mein shamen jala ke baiThe ho

kabhi milo to sar-e-rah dushmani ke liye

awadh ki sham rafiqon ko mah-jabinon ko

har ek chhoD ke aae the bambai ke liye

magar ye kya ki ba-juz-dard kuchh hamein na mila

ajib shahr hai ye ek ajnabi ke liye

hazar chahen na chuTegi hum se ye duniya

yahin rahenge mohabbat ki be-kasi ke liye

koi panah nahin koi ja-e-amn nahin

hayat johd-e-musalsal hai aadmi ke liye

ye kah raha hai koi apne jaan-nisaron se

kuchh aur chahiye ab rasm-e-ashiqi ke liye

kahan kahan na pukara kahan kahan na gae

bas ek tabassum-e-pinhan ki raushni ke liye