wo samne bhi nahin phir bhi un ka shak kyun hai

vo sāmne bhī nahīñ phir bhī un kā shak kyuuñ hai

khilā nahīñ hai agar phuul to mahak kyuuñ hai

ye jū-e-shīr kahīñ jū-e-ḳhūñ na ban jaa.e

ki azm-e-tesha-o-farhād meñ chamak kyuuñ hai

isī ko kyā maiñ mohabbat kī zindagī kah duuñ

ye silsila tirī yādoñ kā aaj tak kyuuñ hai

hamārī āñkhoñ kā sāvan bhī ye samajh na sakā

jazīre ḳhushk haiñ bhīgī huī palak kyuuñ hai

tumhāre ḳhat meñ mohabbat ke rañg bikhre haiñ

jo ye ġhalat hai to lafzoñ meñ phir dhanak kyuuñ hai

mire lahū meñ gulāboñ kā rañg hai 'mutrib'

maiñ kyā batā.ūñ ki is shahd meñ namak kyuuñ hai

wo samne bhi nahin phir bhi un ka shak kyun hai

khila nahin hai agar phul to mahak kyun hai

ye ju-e-shir kahin ju-e-KHun na ban jae

ki azm-e-tesha-o-farhad mein chamak kyun hai

isi ko kya main mohabbat ki zindagi kah dun

ye silsila teri yaadon ka aaj tak kyun hai

hamari aankhon ka sawan bhi ye samajh na saka

jazire KHushk hain bhigi hui palak kyun hai

tumhaare KHat mein mohabbat ke rang bikhre hain

jo ye ghalat hai to lafzon mein phir dhanak kyun hai

mere lahu mein gulabon ka rang hai 'mutrib'

main kya bataun ki is shahd mein namak kyun hai