wo samne hon mere aur nazar jhuki na rahe

vo sāmne hoñ mire aur nazar jhukī na rahe

matā-e-zīst luTā kar koī kamī na rahe

diye jalā.e haiñ maiñ ne khule darīchoñ par

ai tund-o-tez havā tujh ko barhamī na rahe

batāo aisā bhī manzar nazar se guzrā hai

charāġh jalte raheñ aur raushnī na rahe

koī bhī lamha guzartā nahīñ hai tere baġhair

ta.alluqāt meñ aisī bhī chāshnī na rahe

hamāre hausle ko dekh kar ye kahte ho

zabān band rahe aañkh meñ namī na rahe

mile jo raushnī tujh se to zulmateñ kam hoñ

ki tere ba.ad mirī jaan zindagī na rahe

laboñ pe aa gayā dam apnā habs mausam meñ

havā-e-abar-e-bahārāñ yūñhī thamī na rahe

wo samne hon mere aur nazar jhuki na rahe

mata-e-zist luTa kar koi kami na rahe

diye jalae hain main ne khule darichon par

ai tund-o-tez hawa tujh ko barhami na rahe

batao aisa bhi manzar nazar se guzra hai

charagh jalte rahen aur raushni na rahe

koi bhi lamha guzarta nahin hai tere baghair

talluqat mein aisi bhi chashni na rahe

hamare hausle ko dekh kar ye kahte ho

zaban band rahe aankh mein nami na rahe

mile jo raushni tujh se to zulmaten kam hon

ki tere baad meri jaan zindagi na rahe

labon pe aa gaya dam apna habs mausam mein

hawa-e-abar-e-bahaaran yunhi thami na rahe