wo sabr-o-sukun wo zabt-e-fughan ai dida-e-tar hum kho baiThe

vo sabr-o-sukūñ vo zabt-e-fuġhāñ ai dīda-e-tar ham kho baiThe

shab bhar kī kamā.ī haa.e ġhazab hangām-e-sahar ham kho baiThe

sarmāya-e-ulfat the mere kuchh ḳhuun ke qatre kuchh aañsū

ik vaqt magar aisā aaya vo la.al-o-gohar ham kho baiThe

ġham hai ki subūt-e-ishq-o-vafā vaqt aane pe ham deñge bhī to kyā

jazbāt pe qaabū rah na sakā ashkoñ ke guhar ham kho baiThe

ifrāt-e-alam se gar hañsnā bhūle to ye koī baat nahīñ

ham par ye zamāna hañs degā ronā bhī agar ham kho baiThe

har rahbar-e-rāh-e-ulfat kī taqlīd kā ye anjām huā

jis raah meñ mil jaatī manzil vo rāhguzar ham kho baiThe

jazbāt meñ jab tak garmī thī chilman meñ na larzish tak aa.ī

afsos ki ab parda uTThā jab tāb-e-nazar ham kho baiThe

ai 'nūr' shab-e-furqat kī qasam mahrūmī-e-qismat par apnī

rote to haiñ par ab rone kā andāz magar ham kho baiThe

wo sabr-o-sukun wo zabt-e-fughan ai dida-e-tar hum kho baiThe

shab bhar ki kamai hae ghazab hangam-e-sahar hum kho baiThe

sarmaya-e-ulfat the mere kuchh KHun ke qatre kuchh aansu

ek waqt magar aisa aaya wo lal-o-gohar hum kho baiThe

gham hai ki subut-e-ishq-o-wafa waqt aane pe hum denge bhi to kya

jazbaat pe qabu rah na saka ashkon ke guhar hum kho baiThe

ifraat-e-alam se gar hansna bhule to ye koi baat nahin

hum par ye zamana hans dega rona bhi agar hum kho baiThe

har rahbar-e-rah-e-ulfat ki taqlid ka ye anjam hua

jis rah mein mil jati manzil wo rahguzar hum kho baiThe

jazbaat mein jab tak garmi thi chilman mein na larzish tak aai

afsos ki ab parda uTTha jab tab-e-nazar hum kho baiThe

ai 'nur' shab-e-furqat ki qasam mahrumi-e-qismat par apni

rote to hain par ab rone ka andaz magar hum kho baiThe