wo sair-e-gul ke waste aa hi nahin raha

vo sair-e-gul ke vāste aa hī nahīñ rahā

so ab vo lutf-e-āb-o-havā hī nahīñ rahā

shāyad ukhaḌ gayā tirī yādoñ se rañg-e-lams

hāthoñ ko tere shauq-e-hinā hī nahīñ rahā

kyuuñ kāTtī nahīñ hai mirā dard mauj-e-mai

kyā ai sharāb tujh meñ nasha hī nahīñ rahā

le kar to aa ga.e ho shikāyat kā tum javāb

par ab to tum se koī gila hī nahīñ rahā

maiñ kitnī kitnī der manātā rahā use

rūThā huuñ aaj to vo manā hī nahīñ rahā

kyā us ko maiñ vafā ke taqāze batā.ūñ ab

jab vo vafā kā ahd nibhā hī nahīñ rahā

kuchh roz se udaas hai dil aur bahut udaas

aur kyuuñ udaas hai ye batā hī nahīñ rahā

wo sair-e-gul ke waste aa hi nahin raha

so ab wo lutf-e-ab-o-hawa hi nahin raha

shayad ukhaD gaya teri yaadon se rang-e-lams

hathon ko tere shauq-e-hina hi nahin raha

kyun kaTti nahin hai mera dard mauj-e-mai

kya ai sharab tujh mein nasha hi nahin raha

le kar to aa gae ho shikayat ka tum jawab

par ab to tum se koi gila hi nahin raha

main kitni kitni der manata raha use

ruTha hun aaj to wo mana hi nahin raha

kya us ko main wafa ke taqaze bataun ab

jab wo wafa ka ahd nibha hi nahin raha

kuchh roz se udas hai dil aur bahut udas

aur kyun udas hai ye bata hi nahin raha