wo sapnon mein mile aa kar kaho is mein bura kya hai

vo sapnoñ meñ mile aa kar kaho is meñ burā kyā hai

vo bahlātā hai dil ko gar kaho is meñ burā kyā hai

hai barbādī sī ābādī use paane kī ḳhātir maiñ

agar phirtā rahūñ dar-dar kaho is meñ burā kyā hai

nahīñ kuchh rasm-o-rah ham se na milte haiñ na likhte haiñ

magar yaad aate haiñ aksar kaho is meñ burā kyā hai

na luTne kā koī ḳhadsha na Dar hai ab luTeroñ kā

luTāyā jab se apnā ghar kaho is meñ burā kyā hai

ye kyā e.ajāz-e-tark-emai ḳhudā ḳhush hai milā vo bhī

jo misl-e-mai nasha-āvar kaho is meñ burā kyā hai

guzārī umr saarī DhūñDne meñ tum ko ai jānam

na jānūñ farq-e-ḳhair-o-shar kaho is meñ burā kyā hai

tumheñ dekhā to āzādī se mujh ko ho ga.ī nafrat

agar mānūñ tumheñ afsar kaho is meñ burā kyā hai

mujhe 'anvar' satāte ho ghumāte ho nachāte ho

banā huuñ ab maiñ bāzīgar kaho is meñ burā kyā hai

wo sapnon mein mile aa kar kaho is mein bura kya hai

wo bahlata hai dil ko gar kaho is mein bura kya hai

hai barbaadi si aabaadi use pane ki KHatir main

agar phirta rahun dar-dar kaho is mein bura kya hai

nahin kuchh rasm-o-rah hum se na milte hain na likhte hain

magar yaad aate hain aksar kaho is mein bura kya hai

na luTne ka koi KHadsha na Dar hai ab luTeron ka

luTaya jab se apna ghar kaho is mein bura kya hai

ye kya eajaz-e-tark-emai KHuda KHush hai mila wo bhi

jo misl-e-mai nasha-awar kaho is mein bura kya hai

guzari umr sari DhunDne mein tum ko ai jaanam

na jaanun farq-e-KHair-o-shar kaho is mein bura kya hai

tumhein dekha to aazadi se mujh ko ho gai nafrat

agar manun tumhein afsar kaho is mein bura kya hai

mujhe 'anwar' satate ho ghumate ho nachate ho

bana hun ab main bazigar kaho is mein bura kya hai