wo sar se panw talak chahaton mein Duba tha

vo sar se paañv talak chāhatoñ meñ Duubā thā

vo shaḳhs kyā thā mohabbat kā isti.āra thā

na chāñd thā na sitāra na phuul thā na dhanak

vo phir bhī husn kī duniyā meñ ik izāfa thā

mujhe pata hī nahīñ kab vo lafz-e-kun ban kar

mire vajūd ke dīvār-o-dar meñ gūñjā thā

ajiib baat hai dekhā na thā kisī ne use

ajiib baat hai ghar ghar usī kā charchā thā

kisī se koī ġharaz thī na koī aas us ko

vo saarī bhiiḌ se kaT kar akelā rahtā thā

samundaroñ se thī gahrā.ī us kī sochoñ meñ

vo apnī zaat meñ ik kā.enāt jiitā thā

'ḳhumār' naam ke shā.ir se mil chukā huuñ maiñ

udāsiyoñ ke ghane jañgaloñ meñ rahtā thā

wo sar se panw talak chahaton mein Duba tha

wo shaKHs kya tha mohabbat ka istiara tha

na chand tha na sitara na phul tha na dhanak

wo phir bhi husn ki duniya mein ek izafa tha

mujhe pata hi nahin kab wo lafz-e-kun ban kar

mere wajud ke diwar-o-dar mein gunja tha

ajib baat hai dekha na tha kisi ne use

ajib baat hai ghar ghar usi ka charcha tha

kisi se koi gharaz thi na koi aas us ko

wo sari bhiD se kaT kar akela rahta tha

samundaron se thi gahrai us ki sochon mein

wo apni zat mein ek kaenat jita tha

'KHumar' nam ke shair se mil chuka hun main

udasiyon ke ghane jangalon mein rahta tha