wo shaKHs kabhi dasht se guzre use kahna

vo shaḳhs kabhī dasht se guzre use kahnā

ik pal to mire ghar meñ bhī Thahre use kahnā

phir vaqt ke maqtal meñ hī sajtī haiñ vo āñkheñ

jo dekhtī haiñ ḳhvāb sunahre use kahnā

kahnā ki samandar ke kināre pe na jaa.e

kuchh log samandar se bhī gahre use kahnā

chāhat kī bhalā kaun sune rām-kahānī

is shahr ke sab log haiñ bahre use kahnā

is shahr meñ sach kah ke gunahgār na honā

har shaḳhs kī sochoñ pe haiñ pahre use kahnā

wo shaKHs kabhi dasht se guzre use kahna

ek pal to mere ghar mein bhi Thahre use kahna

phir waqt ke maqtal mein hi sajti hain wo aankhen

jo dekhti hain KHwab sunahre use kahna

kahna ki samandar ke kinare pe na jae

kuchh log samandar se bhi gahre use kahna

chahat ki bhala kaun sune ram-kahani

is shahr ke sab log hain bahre use kahna

is shahr mein sach kah ke gunahgar na hona

har shaKHs ki sochon pe hain pahre use kahna