wo shor hai ki yahan kuchh sunai deta nahin

vo shor hai ki yahāñ kuchh sunā.ī detā nahīñ

talāsh jis kī hai vo kyoñ dikhā.ī detā nahīñ

sulag rahā huuñ maiñ barsāt kī bahāroñ meñ

ye merā zarf ki phir bhī duhā.ī detā nahīñ

yatīm pāltī hai bahn kis mashaqqat se

hai dukh kī baat ki imdād bhaa.ī detā nahīñ

vo dar farār ke mujh par khule to rakhtā hai

vo zulf-qaid se lekin rihā.ī detā nahīñ

zamīndār ne dahqāñ kī pag uchhālī aaj

ki fasl kāTtā to hai baTā.ī detā nahīñ

maiñ apne naam kī us meñ lakīr khīñch na luuñ

vo mere haath meñ dast-e-hinā.ī detā nahīñ

na hotī husn kī tausīf gar use maqsūd

to shāhkār ko itnī safā.ī detā nahīñ

kasak jo dil meñ hai baḳhshī huī usī kī hai

maqām ishq talak jo rasā.ī detā nahīñ

'rashīd' peḌ ke saa.e se sukh kī thī ummīd

ye kyā ki beTā bhī ghar meñ kamā.ī detā nahīñ

wo shor hai ki yahan kuchh sunai deta nahin

talash jis ki hai wo kyon dikhai deta nahin

sulag raha hun main barsat ki bahaaron mein

ye mera zarf ki phir bhi duhai deta nahin

yatim palti hai bahn kis mashaqqat se

hai dukh ki baat ki imdad bhai deta nahin

wo dar farar ke mujh par khule to rakhta hai

wo zulf-qaid se lekin rihai deta nahin

zamindar ne dahqan ki pag uchhaali aaj

ki fasl kaTta to hai baTai deta nahin

main apne nam ki us mein lakir khinch na lun

wo mere hath mein dast-e-hinai deta nahin

na hoti husn ki tausif gar use maqsud

to shahkar ko itni safai deta nahin

kasak jo dil mein hai baKHshi hui usi ki hai

maqam ishq talak jo rasai deta nahin

'rashid' peD ke sae se sukh ki thi ummid

ye kya ki beTa bhi ghar mein kamai deta nahin