wo sunte hi nahin to hui dastan abas

vo sunte hī nahīñ to huī dāstāñ abas

shikve abas hamāre hamārā bayāñ abas

lete haiñ bekasoñ ke dil-o-dīn-o-jāñ abas

turkān-e-shoḳh lūTte haiñ kārvāñ abas

duniyā meñ jab ḳhudā hī butoñ ko banā chukā

kartā hai aur fikr-e-sitam āsmāñ abas

tasvīr kī tarah haiñ tirī bazm meñ ḳhamosh

goyā huī hai ḳhalq hamārī zabāñ abas

dil mubtalā-e-dard-o-alam thā gayā gayā

lī jaan bhī butoñ ne huā ye ziyāñ abas

yuuñ hī sitam-kashoñ se taġhāful agar rahā

be-sūd hai umīd-e-vafā imtihāñ abas

honī hai ek roz ḳhizāñ is bahār kī

gulshan meñ kyoñ banā.e koī āshiyāñ abas

us ke sivā hai hech mujhe jumla kā.enāt

vo hī na ho nazar meñ to kaun-o-makāñ abas

baaqī hai dil ke jaane kā siine meñ ek daaġh

hotā hai baad zaḳhm ke jaise nishāñ abas

sote haiñ vo kanār-e-adū meñ tamām raat

misl-e-azān-e-sub.h yahāñ hai fuġhāñ abas

us kī vo guftugū vo tabassum kahāñ nasīb

bulbul kī hai zabān to gul kā dahāñ abas

vo bād-e-marg merī ayādat ko aa.e haiñ

nā-mehrbāñ hue bhī agar mehrbāñ abas

āzār-e-tāza ai sitam-ījād mujh ko de

ḳhū ho ke ho gayā hai ġham-e-jāvedāñ abas

anjām-e-shauq-e-vasl-e-butāñ jāntā to hai

rahtā hai be-qarār mirā rāz-dāñ abas

Thokar lagā.eñ ye bhī girāñ nāzukī se hai

rakhtā huuñ un kī rah meñ sar-e-nā-tavāñ abas

wo sunte hi nahin to hui dastan abas

shikwe abas hamare hamara bayan abas

lete hain bekason ke dil-o-din-o-jaan abas

turkan-e-shoKH luTte hain karwan abas

duniya mein jab KHuda hi buton ko bana chuka

karta hai aur fikr-e-sitam aasman abas

taswir ki tarah hain teri bazm mein KHamosh

goya hui hai KHalq hamari zaban abas

dil mubtala-e-dard-o-alam tha gaya gaya

li jaan bhi buton ne hua ye ziyan abas

yun hi sitam-kashon se taghaful agar raha

be-sud hai umid-e-wafa imtihan abas

honi hai ek roz KHizan is bahaar ki

gulshan mein kyon banae koi aashiyan abas

us ke siwa hai hech mujhe jumla kaenat

wo hi na ho nazar mein to kaun-o-makan abas

baqi hai dil ke jaane ka sine mein ek dagh

hota hai baad zaKHm ke jaise nishan abas

sote hain wo kanar-e-adu mein tamam raat

misl-e-azan-e-subh yahan hai fughan abas

us ki wo guftugu wo tabassum kahan nasib

bulbul ki hai zaban to gul ka dahan abas

wo baad-e-marg meri ayaadat ko aae hain

na-mehrban hue bhi agar mehrban abas

aazar-e-taza ai sitam-ijad mujh ko de

KHu ho ke ho gaya hai gham-e-jawedan abas

anjam-e-shauq-e-wasl-e-butan jaanta to hai

rahta hai be-qarar mera raaz-dan abas

Thokar lagaen ye bhi giran nazuki se hai

rakhta hun un ki rah mein sar-e-na-tawan abas