wo tan ka tamashai raha man nahin dekha

vo tan kā tamāshā.ī rahā man nahīñ dekhā

dahlīz pe aayā bhī to āñgan nahīñ dekhā

chehre pe khulī dhuup meñ is darja magan thā

āñkhoñ se barastā huā sāvan nahīñ dekhā

is samt sameTūñ to bikhartā hai udhar se

dukh dete hue yaar ne dāman nahīñ dekhā

darvāze pe aa kar jo kisī ne bhī sadā dī

dil khol diyā dost ki dushman nahīñ dekhā

ik baar hī aayā thā vo ḳhas-ḳhāna-e-dil meñ

phir mere jahāñ-gard ne ye ban nahīñ dekhā

kyoñ merī tamanna kī taraf dekh rahe ho

kyā tum ne kabhī aag pe ḳhirman nahīñ dekhā

lafzoñ meñ chhupī dard kī ḳhushbū nahīñ dekhī

gul dekhne vāloñ ne bhī gulshan nahīñ dekhā

us ne bhī tabassum kā hunar dekh ke 'nayyar'

ālām chhupāne kā mirā fan nahīñ dekhā

wo tan ka tamashai raha man nahin dekha

dahliz pe aaya bhi to aangan nahin dekha

chehre pe khuli dhup mein is darja magan tha

aankhon se barasta hua sawan nahin dekha

is samt sameTun to bikharta hai udhar se

dukh dete hue yar ne daman nahin dekha

darwaze pe aa kar jo kisi ne bhi sada di

dil khol diya dost ki dushman nahin dekha

ek bar hi aaya tha wo KHas-KHana-e-dil mein

phir mere jahan-gard ne ye ban nahin dekha

kyon meri tamanna ki taraf dekh rahe ho

kya tum ne kabhi aag pe KHirman nahin dekha

lafzon mein chhupi dard ki KHushbu nahin dekhi

gul dekhne walon ne bhi gulshan nahin dekha

us ne bhi tabassum ka hunar dekh ke 'nayyar'

aalam chhupane ka mera fan nahin dekha