wo taqaza-e-junun ab ke bahaaron mein na tha

vo taqāzā-e-junūñ ab ke bahāroñ meñ na thā

ek dāman bhī to uljhā huā ḳhāroñ meñ na thā

ashk-e-ġham tham ga.e yaad aate hī un kī sūrat

jab chaḌhā chāñd to phir nuur sitāroñ meñ na thā

marne jiine ko na samjhe to ḳhatā kis kī hai

kaun sā hukm hai jo un ke ishāroñ meñ na thā

har qadam ḳhaak se dāman ko bachāyā tum ne

phir ye shikva hai ki maiñ rāh-guzāroñ meñ na thā

tum sā lākhoñ meñ na thā jān-e-tamannā lekin

ham sā mahrūm-e-tamannā bhī hazāroñ meñ na thā

'hosh' karte na agar zabt-e-fuġhāñ kyā karte

pursish-e-ġham kā salīqa bhī to yāroñ meñ na thā

wo taqaza-e-junun ab ke bahaaron mein na tha

ek daman bhi to uljha hua KHaron mein na tha

ashk-e-gham tham gae yaad aate hi un ki surat

jab chaDha chand to phir nur sitaron mein na tha

marne jine ko na samjhe to KHata kis ki hai

kaun sa hukm hai jo un ke ishaaron mein na tha

har qadam KHak se daman ko bachaya tum ne

phir ye shikwa hai ki main rah-guzaron mein na tha

tum sa lakhon mein na tha jaan-e-tamanna lekin

hum sa mahrum-e-tamanna bhi hazaron mein na tha

'hosh' karte na agar zabt-e-fughan kya karte

pursish-e-gham ka saliqa bhi to yaron mein na tha