wo tawajjoh wo iltifat nahin

vo tavajjoh vo iltifāt nahīñ

ab vo pahlī sī tum meñ baat nahīñ

ham to sau jaañ se haiñ tum pe nisār

ye burā mānñe kī baat nahīñ

tujh se har din hai roz-e-īd mujhe

kaun sī shab shab-e-barāt nahīñ

zindagī kā hai ik nafas ye madār

ziist kī kuchh bhī kā.enāt nahīñ

jis ke jalvoñ se hai jahāñ māmūr

kaun hai gar ḳhudā kī zaat nahīñ

jis meñ TukḌe jigar na hotā ho

koī din koī aisī raat nahīñ

rang-e-hastī hai dam meñ nau-e-digar

bāġh-e-ālam ko kuchh sabāt nahīñ

ḳhauf-e-roz-e-hisāb ne maarā

ham ko to mar ke bhī najāt nahīñ

roz khātā huuñ maiñ ġham-e-jāñ-kāh

kab na.ī mujh pe vārdāt nahīñ

tang ho kar vo DhūñDhtā huuñ maiñ

jis jagah din nahīñ hai raat nahīñ

ārzū-e-ajal hī baaqī hai

ab koī hasrat-e-hayāt nahīñ

kab janāza yahāñ nahīñ uThtā

kaun hai din yahāñ barāt nahīñ

ek do tiin chaar hoñ sah luuñ

ġham hazāroñ haiñ pāñch saat nahīñ

lab-e-shīrīn-e-yār ke aage

vāqa.ī sabr kuchh nabāt nahīñ

wo tawajjoh wo iltifat nahin

ab wo pahli si tum mein baat nahin

hum to sau jaan se hain tum pe nisar

ye bura manne ki baat nahin

tujh se har din hai roz-e-id mujhe

kaun si shab shab-e-baraat nahin

zindagi ka hai ek nafas ye madar

zist ki kuchh bhi kaenat nahin

jis ke jalwon se hai jahan mamur

kaun hai gar KHuda ki zat nahin

jis mein TukDe jigar na hota ho

koi din koi aisi raat nahin

rang-e-hasti hai dam mein nau-e-digar

bagh-e-alam ko kuchh sabaat nahin

KHauf-e-roz-e-hisab ne mara

hum ko to mar ke bhi najat nahin

roz khata hun main gham-e-jaan-kah

kab nai mujh pe wardat nahin

tang ho kar wo DhunDhta hun main

jis jagah din nahin hai raat nahin

aarzu-e-ajal hi baqi hai

ab koi hasrat-e-hayat nahin

kab janaza yahan nahin uThta

kaun hai din yahan baraat nahin

ek do tin chaar hon sah lun

gham hazaron hain panch sat nahin

lab-e-shirin-e-yar ke aage

waqai sabr kuchh nabaat nahin