wo tez-rau tha magar ruk ke dekhna us ka

vo tez-rau thā magar ruk ke dekhnā us kā

musāfiroñ pe to uqda na khul sakā us kā

vo nek-dil hai bhalā hai ḳhudā-shanās bhī hai

kise ravā hai ki dil se kare gila us kā

shajar ne paat uThā.e to ham bhī jaag uThe

hameñ thā pesh zamāne meñ faisla us kā

vo mere naam kī tasbīh kyoñ nahīñ kartā

mohabbatoñ meñ ravayya hai aam sā us kā

kisī kisī ko banāte haiñ rāzdār apnā

kisī kisī ko sunāte haiñ marsiya us kā

jamāl-e-yār kā naqsha kahīñ se khiñchtā hai

varā-e-fahm se uThtā hai zāviya us kā

ye lag rahā hai mohabbat kī umr ḳhatm huī

ki hijr phailtā jaatā hai jā-ba-jā us kā

vahī 'adan' jo sitāroñ kī baat kartā thā

ḳhud apnā chāñd to gahnā ke rah gayā us kā

wo tez-rau tha magar ruk ke dekhna us ka

musafiron pe to uqda na khul saka us ka

wo nek-dil hai bhala hai KHuda-shanas bhi hai

kise rawa hai ki dil se kare gila us ka

shajar ne pat uThae to hum bhi jag uThe

hamein tha pesh zamane mein faisla us ka

wo mere nam ki tasbih kyon nahin karta

mohabbaton mein rawayya hai aam sa us ka

kisi kisi ko banate hain raazdar apna

kisi kisi ko sunate hain marsiya us ka

jamal-e-yar ka naqsha kahin se khinchta hai

wara-e-fahm se uThta hai zawiya us ka

ye lag raha hai mohabbat ki umr KHatm hui

ki hijr phailta jata hai ja-ba-ja us ka

wahi 'adan' jo sitaron ki baat karta tha

KHud apna chand to gahna ke rah gaya us ka