wo tishnagi-e-shauq bujhate to baat thi

vo tishnagī-e-shauq bujhāte to baat thī

TuuTe diloñ kī aas bañdhāte to baat thī

chhup kar tabāhiyāñ mirī kyā dekhte haiñ aap

parda ulaT ke sāmne aate to baat thī

pāmāl gar sitam se kiyā bhī to kyā kiyā

lutf-o-karam se mujh ko miTāte to baat thī

gar kī nazar-navāzī to kyā josh-e-husn ko

asrār-e-dil-navāz sikhāte to baat thī

kar ke tabāh mujh ko pashemāñ hue to kyā

kuchh din vo mere naaz uThāte to baat thī

ruḳh se agar naqāb ulaT bhī diyā to kyā

hastī kā merī parda uThāte to baat thī

kyoñ phūñk Daalā aap ne be-vajah tuur ko

barq-e-jamāl dil pe girāte to baat thī

sham-e-umīd kis liye gul kar dī aap ne

gar mash.al-e-hayāt bujhāte to baat thī

badmast kar ke chhoḌ diyā haa.e kyā kiyā

phir se vo mujh ko hosh meñ laate to baat thī

'sāhir' uThā.e haath duā ke liye to kyā

gar haath tum duā se uThāte to baat thī

wo tishnagi-e-shauq bujhate to baat thi

TuTe dilon ki aas bandhate to baat thi

chhup kar tabahiyan meri kya dekhte hain aap

parda ulaT ke samne aate to baat thi

pamal gar sitam se kiya bhi to kya kiya

lutf-o-karam se mujh ko miTate to baat thi

gar ki nazar-nawazi to kya josh-e-husn ko

asrar-e-dil-nawaz sikhate to baat thi

kar ke tabah mujh ko pasheman hue to kya

kuchh din wo mere naz uThate to baat thi

ruKH se agar naqab ulaT bhi diya to kya

hasti ka meri parda uThate to baat thi

kyon phunk Dala aap ne be-wajah tur ko

barq-e-jamal dil pe giraate to baat thi

sham-e-umid kis liye gul kar di aap ne

gar mashal-e-hayat bujhate to baat thi

badmast kar ke chhoD diya hae kya kiya

phir se wo mujh ko hosh mein late to baat thi

'sahir' uThae hath dua ke liye to kya

gar hath tum dua se uThate to baat thi